Unang Cronicas

10 Karon ang mga Filistehanon nakig-away sa Israel. Ug ang mga lalaki sa Israel nangalagiw gikan sa mga Filistehanon, ug daghan ang napatay didto sa Bukid sa Gilboa.+ 2 Gigukod sa mga Filistehanon si Saul ug ang iyang mga anak, ug gipatay sa mga Filistehanon si Jonatan, Abinadab, ug Malki-sua,+ nga mga anak ni Saul. 3 Migrabe ang pagpakig-away batok kang Saul ug nakit-an siya sa mga magpapana, ug siya gisamdan nila.+ 4 Unya si Saul miingon sa tigdala sa iyang hinagiban: “Ibta ang imong espada ug duslaka ko, aron dili moanhi kining mga dili tinuli ug paantoson+ ko.” Apan midumili ang tigdala sa iyang hinagiban kay nahadlok siya pag-ayo. Busa gikuha ni Saul ang espada ug giunay ang iyang kaugalingon.+ 5 Pagkakita sa tigdala sa hinagiban ni Saul nga siya patay na, siya usab nag-unay sa iyang kaugalingon gamit ang iyang espada ug namatay. 6 Busa si Saul ug ang iyang tulo ka anak namatay, ug ang tanan sa iyang panimalay nangamatay.+ 7 Pagkahibalo sa tibuok katawhan sa Israel nga didto sa walog* nga ang tanan nangalagiw ug nga si Saul ug ang iyang mga anak namatay, sila mibiya sa ilang mga siyudad ug nangalagiw; unya ang mga Filistehanon miabot ug mipuyo niini.

8 Pagkaugma, dihang ang mga Filistehanon miabot aron panguhaan ug mga butang ang nangamatay, ilang nakaplagan si Saul ug ang iyang mga anak nga nagbuy-od sa Bukid sa Gilboa.+ 9 Busa ilang gihukasan siya ug gipunggotan ug gikuha ang iyang armadura,* ug sila nagpadalag mensahe sa tibuok yuta sa mga Filistehanon aron ibalita kini ngadto sa mga templo sa ilang mga idolo+ ug ngadto sa katawhan. 10 Unya ilang gibutang ang iyang armadura* sa templo sa ilang diyos ug gilansang ang iyang ulo sa templo ni Dagon.+

11 Pagkadungog sa tanang didto sa Jabes+ sa Gilead bahin sa tanang gibuhat sa mga Filistehanon kang Saul,+ 12 ang tanang manggugubat migikan ug ilang gidala ang patayng lawas ni Saul ug ang patayng lawas sa iyang mga anak. Ila kining gidala sa Jabes ug gilubong ang mga bukog ilalom sa dakong kahoy sa Jabes,+ ug sila nagpuasa sulod sa pito ka adlaw.

13 Busa si Saul namatay kay siya wala magmatinumanon kang Jehova sanglit wala niya tumana ang pulong ni Jehova,+ ug mikonsulta usab siyag espiritista+ 14 imbes mokonsulta kang Jehova. Busa Iyang gipatay siya ug gihatag ang pagkahari ngadto kang David nga anak ni Jese.+