Deuteronomio

25 “Kon magbangi ang duha ka tawo, moatubang sila sa mga maghuhukom,+ ug hukman nilang inosente ang matarong ug hukmang sad-an ang daotan.+ 2 Kon ang daotan angayng bunalan,+ pahapaon siya sa maghuhukom sa iyang atubangan ug pabunalan. Ang gidaghanon sa pagbunal magdepende kon unsa ka daotan ang iyang gibuhat. 3 Puwede siyang bunalan hangtod 40 ka beses,+ ug dili na pasobrahan. Kay kon mosobra niini ang pagbunal, ang imong igsoon maulawan sa imong atubangan.

4 “Ayawg busali ang torong baka samtang naggiok kini.+

5 “Kon ang magsoon managsilingan ug usa nila mamatay nga walay anak nga lalaki, ang asawa sa namatay kinahanglang dili makigminyo ug dili kabanay sa iyang bana. Ang iyang bayaw moadto niya ug tumanon ang iyang obligasyon* ug pangasaw-on ang biyuda sa iyang igsoon.+ 6 Ang panganay nilang anak nga lalaki isipong anak* sa namatay,+ aron ang iyang ngalan dili mapapas sa Israel.+

7 “Karon kon ang igsoon dili gustong mangasawa sa iyang bayaw, ang biyuda angayng moadto sa mga ansiyano diha sa ganghaan sa siyudad ug moingon, ‘Dili gusto sa akong bayaw nga magpabilin sa Israel ang ngalan sa iyang igsoon. Wala niya tumana ang iyang obligasyon* nga minyoan ko.’ 8 Ang lalaki ipatawag sa mga ansiyano sa ilang siyudad ug sila makigsulti niya. Kon mobalibad gyod siya ug moingon, ‘Dili ko makigminyo niya,’ 9 duolon siya sa biyuda atubangan sa mga ansiyano, huboan sa iyang sandalyas,+ lud-an sa nawong, ug ingnan, ‘Mao ni ang himoon ngadto sa tawo nga dili gustong magpatunghag anak nga lalaki para sa iyang igsoon.’ 10 Unya ang iyang panimalay* mailado sa Israel nga ‘Ang panimalay sa usa nga gihuboag sandalyas.’

11 “Kon mag-away ang duha ka lalaki, unya ang asawa sa usa molaban sa iyang bana ug iyang gunitan ang kinatawo sa nagdapat sa iyang bana, 12 putla ang iyang kamot. Ayaw siyag kaluy-i.

13 “Ayaw pagbutang sa imong sudlanan ug duha ka klase nga pangtimbang nga mga bato,+ usa ka dako ug usa ka gamay. 14 Ayaw pagbaton sa imong balay ug duha ka matang sa sudlanan* nga pangsukod,+ usa ka dako ug usa ka gamay. 15 Kinahanglang husto ug tukma ang bato sa imong timbangan ug ang imong pangsukod, aron mabuhi kag dugay sa yuta nga ihatag kanimo ni Jehova nga imong Diyos.+ 16 Kay ang mga tikasan nga nagbuhat niining mga butanga gidumtan ni Jehova nga imong Diyos.+

17 “Hinumdomi ang gibuhat kaninyo ni Amalek dihang nagpanaw mo paggawas ninyo sa Ehipto,+ 18 kon giunsa mo niya pagsugat ug kon giunsa niya pag-atake ang tanang naa sa luyo ninyo dihang gipangkapoy mo ug nangaluya. Wala siya mahadlok sa Diyos. 19 Dihang hatagan na mog pahulay ni Jehova nga inyong Diyos gikan sa tanan ninyong kaaway sa palibot sa yuta nga ihatag kaninyo ni Jehova nga inyong Diyos ingong panulondon nga panag-iyahon,+ puoha ang mga Amalekanhon gikan sa yuta* aron dili na sila mahinumdoman pa.+ Ayaw gyod mog kalimot.