Deuteronomio

13 “Kon naay propeta* o tawo nga managna pinaagig damgo sa inyong taliwala ug hatagan mo niyag ilhanan o tilimad-on, 2 ug matinuod ang ilhanan o tilimad-on nga iyang gisulti kaninyo, unya siya moingon, ‘Mosunod ta sa laing mga diyos,’ mga diyos nga wala ninyo mailhi, ‘ug moalagad ta nila,’ 3 ayaw paminawa ang maong propeta o magdadamgo,+ kay gisulayan mo ni Jehova nga inyong Diyos+ kon kamo ba nahigugma kang Jehova nga inyong Diyos sa bug-os ninyong kasingkasing ug sa bug-os ninyong kalag.*+ 4 Sunda ninyo si Jehova nga inyong Diyos, kahadloki siya, tumana ang iyang mga sugo, paminawa siya, alagara siya, ug ayawg biya niya.+ 5 Apan kinahanglang patyon ang maong propeta o magdadamgo,+ kay nag-aghat siyag pagrebelde batok kang Jehova nga inyong Diyos, kinsa nagpagawas ninyo sa Ehipto ug nagtubos ninyo gikan sa pagkaulipon, aron motipas mo sa dalan nga gipasubay kaninyo ni Jehova nga inyong Diyos. Ug kinahanglang kuhaon ninyo ang daotan gikan sa inyong taliwala.+

6 “Kon sekretohon kag haylo sa imong igsoong lalaki nga anak sa imong inahan o sa imong anak nga lalaki o babaye o sa imong pinanggang asawa o sa imong kinasuorang higala, nga mag-ingon, ‘Dali, mag-alagad ta sa laing mga diyos,’+ mga diyos nga wala nimo mailhi ug wala sab mailhi sa imong mga katigulangan, 7 mga diyos sa katawhan sa inyong palibot, duol man o layo kaninyo, bisan asang dapita sa yuta, 8 ayawg pahaylo o pamati niya,+ ug ayaw siyag kaluy-i o panalipdi; 9 kinahanglang patyon nimo siya.+ Ikaw ang unang mobato niya, dayon batoon siya sa tibuok katawhan.+ 10 Batoa siya hangtod mamatay,+ kay gihaylo ka niya sa pagtalikod kang Jehova nga imong Diyos, kinsa nagpagawas nimo sa Ehipto diin ka giulipon. 11 Unya ang tibuok Israel makadungog niini ug mahadlok, ug dili na sila mobuhat pa ug bisan unsang daotang butang nga sama niini sa inyong taliwala.+

12 “Kon mabalitaan ninyo kini sa usa sa mga siyudad nga ihatag kaninyo ni Jehova nga inyong Diyos aron puy-an, 13 ‘Naay mga tawong walay pulos nga naghaylo sa mga namuyo sa ilang siyudad sa pagtalikod sa Diyos, nga nag-ingon: “Mangadto ta ug mag-alagad sa laing mga diyos,” mga diyos nga wala ninyo mailhi,’ 14 kinahanglang imbestigahan ninyo kini pag-ayo;+ ug kon mapamatud-an nga nahitabo kining daotang butang sa inyong taliwala, 15 patya ang mga namuyo nianang siyudara pinaagig espada.+ Laglaga ang siyudad ug ang tanang anaa niini, apil ang mga hayop.+ 16 Kuhaa ang tanang inilog ug tigoma kini sa tunga sa plasa ug sunoga ang siyudad, ug ang tanang inilog magsilbing tibuok nga halad para kang Jehova nga inyong Diyos. Kining siyudara magpabiling gun-ob. Dili na kini tukoron pag-usab. 17 Ayaw pagkuhag bisan unsa nga gilain aron laglagon,*+ aron mawala ang nagsilaob nga kasuko ni Jehova ug kaluy-an mo niya ug padaghanon mo, sumala sa iyang gisaad sa inyong mga katigulangan.+ 18 Kay kinahanglan ninyong sundon si* Jehova nga inyong Diyos pinaagi sa pagtuman sa tanan niyang sugo nga akong gihatag kaninyo karon, aron mabuhat ninyo kon unsay husto sa panan-aw ni Jehova nga inyong Diyos.+