Deuteronomio

29 Kini ang mga pulong sa pakigsaad nga gisugo ni Jehova kang Moises nga himoon uban sa katawhan sa Israel sa yuta sa Moab, dugang pa sa pakigsaad nga iyang gihimo uban kanila sa Horeb.+

2 Unya gipatawag ni Moises ang tibuok Israel ug giingnan: “Nakita ninyo sa Ehipto ang tanang gihimo ni Jehova sa Paraon, sa tanan niyang alagad, ug sa tibuok niyang yuta,+ 3 ang dagkong paghukom* nga inyong nakita, kadtong dagkong mga ilhanan ug milagro.+ 4 Apan hangtod karon wala mo hatagi ni Jehova ug kasingkasing nga makasabot, mata nga makakita, ug dalunggan nga makadungog.+ 5 ‘Sulod sa 40 ka tuig nga gigiyahan ta mo sa kamingawan,+ wala madunot ang inyong mga besti ug wala madaot ang inyong mga sandalyas.+ 6 Wala moy makaon nga tinapay ug wala moy mainom nga bino o bisan unsang alkoholikong ilimnon, pero giatiman mo nako aron makaila mo nga ako si Jehova nga inyong Diyos.’ 7 Sa ulahi nakaabot mo niining dapita, ug si Sihon nga hari sa Hesbon+ ug si Og nga hari sa Basan+ nakiggubat nato, apan napildi nato sila.+ 8 Unya gikuha nato ang ilang yuta ug gihatag kini ngadto sa tribo ni Ruben, ni Gad, ug sa katunga sa tribo ni Manases ingong ilang panulondon.+ 9 Busa tumana ang mga pulong niini nga pakigsaad, aron maayo ang resulta sa tanan ninyong buhaton.+

10 “Kamong tanan nagtindog karon sa atubangan ni Jehova nga inyong Diyos, ang mga pangulo sa inyong mga tribo, ang inyong mga ansiyano, ang inyong mga opisyal, ang tanang lalaki sa Israel, 11 ang inyong mga bata, mga asawa,+ ug ang mga langyaw+ nga nagpuyo sa inyong mga kampo, gikan sa inyong tigpangahoy hangtod sa inyong tigkalos ug tubig. 12 Nia mo dinhi aron makigbahin sa pakigsaad ni Jehova nga inyong Diyos ug sa iyang panumpa, nga himoon kaninyo karon ni Jehova nga inyong Diyos+ 13 aron niining adlawa kamo mahimong iyang katawhan+ ug siya mahimong inyong Diyos,+ sumala sa iyang gisaad kaninyo ug sumala sa iyang gipanumpa sa inyong katigulangan, kang Abraham,+ Isaac,+ ug Jacob.+

14 “Dili lamang kaninyo nga ako naghimo niini nga pakigsaad ug panumpa, 15 kondili niadtong nagtindog usab uban kanato karon atubangan ni Jehova nga atong Diyos ug niadtong dili nato kauban karon. 16 (Kay nahibalo mo pag-ayo kon unsay atong kinabuhi sa Ehipto ug kon giunsa nato pag-agi sa lainlaing nasod panahon sa atong panaw.+ 17 Ug nakita ninyo ang ilang dulumtanang mga butang ug ang ilang makaluod nga mga idolo*+ nga kahoy ug bato, plata ug bulawan.) 18 Pagbantay nga walay lalaki o babaye, banay o tribo gikan kaninyo karon nga ang kasingkasing moluib kang Jehova nga atong Diyos ug moalagad sa mga diyos niadtong mga nasora,+ aron walay tawo kaninyo nga samag gamot nga magpatunghag makahilo nga bunga ug pait nga tanom.*+

19 “Apan kon may makadungog sa mga pulong niini nga panumpa ug siya manghambog diha sa iyang kasingkasing, nga mag-ingon, ‘Molampos ko bisag tumanon nako ang akong gusto,’* nga moresulta sa ikadaot sa tanan, 20 dili siya pasayloon ni Jehova.+ Mosilaob hinuon ang grabeng kasuko ni Jehova batok nianang tawhana, ug ang tanang tunglo nga nasulat niining basahona seguradong mahitabo kaniya,+ ug papason gayod ni Jehova ang iyang ngalan gikan sa yuta. 21 Unya ilain siya ni Jehova gikan sa tanang tribo sa Israel aron silotan sumala sa tanang tunglo sa pakigsaad nga nasulat niini nga basahon sa Balaod.

22 “Dihang makita sa umaabot nga henerasyon sa inyong mga anak ug sa langyaw nga gikan sa layong lugar ang mga hampak nga gipahamtang ni Jehova nianang yutaa— 23 asupre, asin, ug sunog, mao nga ang tibuok yuta dili matamnan ug walay moturok nga bisan unsa, sama sa pagkapukan sa Sodoma ug Gomora,+ Adma ug Zeboiim,+ nga gilaglag ni Jehova tungod sa iyang kasuko ug kapungot— 24 sila ug ang tanang nasod mangutana, ‘Nganong gibuhat kini ni Jehova niining yutaa?+ Nganong grabe kaayo ang iyang kasuko?’ 25 Unya sila moingon, ‘Tungod kay gitalikdan nila ang pakigsaad ni Jehova,+ ang Diyos sa ilang mga katigulangan, nga iyang gihimo uban kanila dihang iyang gipagawas sila sa Ehipto.+ 26 Mialagad ug miyukbo hinuon sila sa laing mga diyos, mga diyos nga wala nila mailhi ug wala niya itugot nga ilang simbahon.+ 27 Tungod sa grabeng kasuko ni Jehova nianang yutaa, iyang gipahamtang niana ang tanang tunglo nga nasulat niining basahona.+ 28 Busa giluka sila ni Jehova sa ilang yuta tungod sa iyang kasuko+ ug grabeng kapungot ug gidala sila ngadto sa laing yuta, diin tua sila karon.’+

29 “Ang mga butang nga tinago iya ni Jehova nga atong Diyos,+ apan ang mga butang nga iyang gipadayag maoy para kanato ug sa atong mga kaliwat hangtod sa hangtod, aron matuman nato ang tanang pulong niini nga Balaod.+