Deuteronomio

19 “Dihang laglagon ni Jehova nga inyong Diyos ang mga nasod kansang yuta ihatag kaninyo ni Jehova nga inyong Diyos, ug mapahawa na ninyo sila ug magpuyo na mo sa ilang mga siyudad ug mga balay,+ 2 paggahin mog tulo ka siyudad sa yuta nga ihatag kaninyo ni Jehova nga inyong Diyos aron mapanag-iya.+ 3 Bahina sa tulo ka bahin ang yuta nga ihatag kaninyo ni Jehova nga inyong Diyos, ug paghimog mga dalan aron kadtong makapatay makadagan sa usa niining mga siyudara.

4 “Karon kini ang mahitabo bahin sa nakapatay nga modangop didto aron magpabiling buhi: Kon makapatay siyag tawo nga wala tuyoa ug wala siyay pagdumot kaniya,+ 5 sama pananglitan sa dihang moadto sila sa iyang kauban sa kakahoyan aron mangahoy, ug sa pag-atsa niya sa kahoy, nahuslo ang ulo sa atsa ug naigo ang iyang kauban ug namatay, ang nakapatay modagan paingon sa usa niining mga siyudara aron magpabiling buhi.+ 6 Kay kon dili, ang nakapatay basig gukdon sa tigpanimalos sa dugo+ tungod sa grabeng kasuko* ug maapsan siya ug mapatay, kay layo kaayo ang siyudad. Apan dili siya angayng mamatay kay wala man siyay pagdumot sa iyang napatay.+ 7 Kanay hinungdan nga gisugo mo nako nga maggahin ug tulo ka siyudad.

8 “Kon padak-on ni Jehova nga inyong Diyos ang inyong teritoryo sumala sa iyang gipanumpa sa inyong mga katigulangan+ ug iya nang nahatag kaninyo ang tibuok yuta nga iyang gisaad sa inyong mga katigulangan+ 9 —basta tumanon lang ninyo kining tanang sugo nga akong gihatag kaninyo karon, nga higugmaon si Jehova nga inyong Diyos ug kanunayng subayon ang iyang mga dalan+⁠—​nan ang tulo ka siyudad dugangan pa ninyog tulo.+ 10 Sa ingon, walay inosenteng tawo nga mamatay*+ sa yuta nga ihatag kaninyo ni Jehova nga inyong Diyos ingong panulondon, ug dili mo mahimong sad-an sa dugo.+

11 “Apan kon ang usa ka tawo nagdumot sa iyang isigkatawo+ ug iyang giatngan ug gisamdan kini* ug kini namatay, unya siya midangop sa usa niining mga siyudara, 12 ipakuha siya didto sa mga ansiyano sa iyang siyudad, ug ilang itugyan siya sa tigpanimalos sa dugo kay angay siyang mamatay.+ 13 Dili mo angayng maluoy niya, ug angay ninyong kuhaon gikan sa Israel ang sala sa pagpatay ug inosenteng tawo,+ aron maayo ang inyong dangatan.

14 “Kon madawat na ninyo ang inyong panulondon sa yuta nga ihatag kaninyo ni Jehova nga inyong Diyos, ayawg isibog ang mohon sa imong isigkatawo+ kon diin kini gibutang sa inyong mga katigulangan.

15 “Dili puwedeng hukman ang usa ka tawo sa bisan unsang kasaypanan o sala kon usa ra ka saksi ang motestigo.+ Kinahanglang duha o tulo ka saksi ang motestigo aron mapamatud-an ang usa ka butang.+ 16 Kon dunay saksi nga tinuyong magdaot sa usa ka tawo ug akusahan niya kini nga nakasala,+ 17 ang duha ka tawo nga nagkabangi motindog atubangan ni Jehova, atubangan sa mga saserdote ug mga maghuhukom nga mag-alagad nianang panahona.+ 18 Imbestigahan kinig maayo sa mga maghuhukom,+ ug kon ang maong tawo maoy bakakong saksi ug bakak ang akusasyon niya sa iyang igsoon, 19 buhata kaniya ang gusto unta niyang mahitabo sa iyang igsoon.+ Kinahanglang kuhaon ninyo ang daotan gikan sa inyong taliwala.+ 20 Dihang madungog kini sa uban, sila mahadlok ug dili na gyod mohimog bisan unsang daotang butang nga sama niini sa inyong taliwala.+ 21 Dili mo angayng maluoy:+ Kinabuhi para sa kinabuhi, mata para sa mata, ngipon para sa ngipon, kamot para sa kamot, tiil para sa tiil.+