Deuteronomio
15 “Sa kada ikapitong tuig, himoon ang pagpahigawas gikan sa utang.+ 2 Kini ang paagi sa pagpahigawas: Ipahigawas sa tanang nagpautang ang ilang isigkatawo gikan sa iyang utang. Dili nila singlon ang ilang isigkatawo o igsoon, kay kini nga pagpahigawas ipahibalo aron pasidunggan si Jehova.+ 3 Puwede ninyong singlon ang langyaw,+ apan ipahigawas ninyo ang inyong igsoon sa bisan unsa niyang utang. 4 Hinuon walay mahimong pobre ninyo, kay panalanginan gyod mo ni Jehova+ sa yuta nga ihatag ni Jehova nga inyong Diyos ingong inyong panulondon, 5 basta mosunod lang mo kang Jehova nga inyong Diyos ug motuman niining tanang sugo nga akong gihatag kaninyo karon.+ 6 Kay panalanginan mo ni Jehova nga inyong Diyos sumala sa iyang gisaad kaninyo, ug magpahulam mo* sa daghang nasod, apan kamo dili kinahanglang manghulam;+ ug gamhan ninyo ang daghang nasod, apan kamo dili nila magamhan.+
7 “Kon naa kay igsoon nga mahimong pobre sa usa sa inyong mga siyudad, sa yuta nga ihatag kanimo ni Jehova nga imong Diyos, ayaw pagahia ang imong kasingkasing o ayaw kumkoma ang imong kamot batok sa imong igsoong pobre.+ 8 Kay kinahanglang buksan nimo ang imong kamot kaniya+ ug pahulamon siya* bisan unsay iyang gikinahanglan o wala kaniya. 9 Pagbantay nga dili motungha sa imong kasingkasing kining daotang ideya, ‘Hapit na ang ikapitong tuig, ang tuig sa pagpahigawas,’+ ug magdinalo ka sa imong pobre nga igsoon ug dili mohatag niya. Kon motawag siya kang Jehova sa pagreklamo batok nimo, mahimo kang sad-an.+ 10 Kinahanglang mahinatagon ka kaniya,+ ug dili ka mohatag nga pinugos, kay pinaagi niini panalanginan ka ni Jehova nga imong Diyos sa tanan nimong buluhaton ug ginahimo.+ 11 Kay dili mawad-ag pobre ang yuta.+ Mao nga gisugo ti ka, ‘Kinahanglang buksan nimo ang imong kamot sa nag-antos ug sa pobre nimong igsoon sa inyong yuta.’+
12 “Kon gibaligya kanimo ang usa sa imong mga igsoon nga Hebreohanong lalaki o babaye, ug siya nakaalagad na kanimog unom ka tuig, pagawsa siya sa ikapitong tuig.+ 13 Kon imo na siyang pagawson, ayaw siyag palakwa nga walay dala. 14 Ayaw pagtinihik sa paghatag kaniya gikan sa imong kahayopan, giokanan, ug pug-anag lana ug bino. Sama nga gipanalanginan ka ni Jehova nga imong Diyos, hatagi sab siya. 15 Hinumdomi nga naulipon ka sa Ehipto ug gitubos ka ni Jehova nga imong Diyos. Mao nga gisugo ti ka karon nga himoon kini.
16 “Apan kon ingnon ka niya, ‘Dili ko mobiya nimo!’ kay gimahal ka niya ug ang imong panimalay, ug malipayon siyang nag-alagad nimo,+ 17 pagkuhag pangtusok ug dad-a siya sa may pultahan ug tusoka ang iyang dalunggan, ug mahimo nimo siyang ulipon sa tibuok niyang kinabuhi. Mao pod nay buhata sa imong ulipong babaye. 18 Kinahanglang dili bug-at sa imong buot dihang imo siyang pagawson ug mobiya siya, kay siya nakaalagad kanimog unom ka tuig ug nakagasto lang kag katunga sa angayng isuhol sa usa ka sinuholang trabahador, ug dagaya kang gipanalanginan ni Jehova nga imong Diyos.
19 “Balaana para kang Jehova nga imong Diyos ang matag panganay nga laki sa imong baka ug karnero.+ Dili nimo gamiton sa pagtrabaho ang panganay sa imong baka* o tupihan ang panganay sa imong karnero. 20 Kada tuig, kaonon nimo kini uban sa imong panimalay atubangan ni Jehova nga imong Diyos sa dapit nga pilion ni Jehova.+ 21 Apan kon kini may depekto—piang, buta, o uban pang grabeng depekto—ayaw kinig ihalad kang Jehova nga imong Diyos.+ 22 Kan-a kini sa inyong mga siyudad.* Ang tawong hugaw ug hinlo makakaon niini, parehas sa inyong pagkaog gasela ug osa.+ 23 Apan ayawg kan-a ang dugo niini.+ Ipaagas kini sa yuta samag tubig.+