Deuteronomio

16 “Hinumdomi ang bulan sa Abib,* ug sauloga ang Paskuwa para kang Jehova nga inyong Diyos,+ kay sa bulan sa Abib gipagawas mo ni Jehova nga inyong Diyos gikan sa Ehipto panahon sa kagabhion.+ 2 Itanyag ang halad sa Paskuwa kang Jehova nga inyong Diyos,+ gikan sa inyong mga karnero ug mga baka,+ sa dapit nga pilion ni Jehova nga butangan sa iyang ngalan.+ 3 Kan-a kini uban ang tinapay nga walay pangpatubo.*+ Ayaw mog kaon ug bisan unsa nga may pangpatubo sulod sa pito ka adlaw. Tinapay lang nga walay pangpatubo ang inyong kaonon, parehas sa inyong gihimo dihang nagdalidali mog biya sa Ehipto.+ Pinaagi niini mahinumdom mo sa kasakit nga inyong giantos didto. Ug dili mo malimot kon giunsa mo pagluwas gikan sa Ehipto.+ 4 Sulod sa pito ka adlaw, kinahanglan nga sa tibuok ninyong teritoryo walay minasa nga may pangpatubo,+ ug ang bisan unsang karne sa halad nga inyong itanyag sa gabii sa unang adlaw dili angayng pabuntagan.+ 5 Dili ninyo puwedeng itanyag ang halad sa Paskuwa sa bisan asa lang nga siyudad nga ihatag kaninyo ni Jehova nga inyong Diyos. 6 Apan itanyag kini sa dapit nga pilion ni Jehova nga inyong Diyos nga butangan sa iyang ngalan. Itanyag ninyo ang halad sa Paskuwa pagkagabii inigsalop gyod sa adlaw,+ sa petsa* nga migawas mo sa Ehipto. 7 Lutoa kini ug kan-a+ sa dapit nga pilion ni Jehova nga inyong Diyos,+ ug pagkabuntag balik mo sa inyong tolda. 8 Tinapay nga walay pangpatubo ang inyong kaonon sa unom ka adlaw, ug sa ikapitong adlaw dunay solemneng panagkatigom para kang Jehova nga inyong Diyos. Ayaw mo paghimog bisan unsang buluhaton.+

9 “Pag-ihap mog pito ka semana. Sugdi pag-ihap ang pito ka semana dihang magsugod na mog galab sa inyong sebada.+ 10 Dayon sauloga ang Pista sa mga Semana para kang Jehova nga inyong Diyos,+ nga maghatag sa inyong kinabubut-ong halad, sumala sa panalangin nga inyong nadawat kang Jehova nga inyong Diyos.+ 11 Ug paglipay mo atubangan ni Jehova nga inyong Diyos, kamo ug ang inyong mga anak nga lalaki ug babaye, mga ulipong lalaki ug babaye, mga Levihanon sa inyong mga siyudad,* mga langyaw nga residente, mga batang wala nay amahan,* ug mga biyuda sa inyong taliwala, sa dapit nga pilion ni Jehova nga inyong Diyos nga butangan sa iyang ngalan.+ 12 Hinumdomi nga naulipon mo sa Ehipto,+ ug tumana gayod kini nga mga regulasyon.

13 “Sauloga ang Pista sa mga Balongbalong*+ sulod sa pito ka adlaw dihang manghipos mo sa mga abot gikan sa inyong mga giokanan ug pug-anag lana ug bino. 14 Paglipay mo panahon sa inyong pista,+ kamo ug ang inyong mga anak nga lalaki ug babaye, mga ulipong lalaki ug babaye, mga Levihanon, mga langyawng residente, mga batang wala nay amahan, ug mga biyuda sa inyong mga siyudad. 15 Pito ka adlaw ninyong saulogon ang pista+ para kang Jehova nga inyong Diyos sa dapit nga pilion ni Jehova, kay panalanginan ni Jehova nga inyong Diyos ang tanan ninyong alanihon ug buluhaton,+ ug malipay gyod mo.+

16 “Katulo sa usa ka tuig, ang tanang lalaki kinahanglang moatubang kang Jehova nga inyong Diyos sa dapit nga iyang pilion: sa Pista sa Tinapay nga Walay Pangpatubo,+ Pista sa mga Semana,+ ug sa Pista sa mga Balongbalong,*+ ug walay moatubang kang Jehova nga walay dala. 17 Ang matag usa ninyo kinahanglang magdalag gasa sumala sa panalangin nga nadawat ninyo kang Jehova nga inyong Diyos.+

18 “Pagtudlog mga maghuhukom+ ug mga opisyal para sa matag tribo sa tanang siyudad* nga ihatag kaninyo ni Jehova nga inyong Diyos, ug maghukom sila sa katawhan sa matarong nga paagi. 19 Ayawg tuisa ang hustisya,+ ayaw pagpihigpihig,+ ug ayaw pagdawat ug hiphip, kay tungod sa hiphip mabutaan ang mga mata sa mga maalamon+ ug matuis ang mga pulong sa mga matarong. 20 Hustisya—subaya ang hustisya,+ aron magpabilin mong buhi ug mapanag-iya ninyo ang yuta nga ihatag kaninyo ni Jehova nga inyong Diyos.

21 “Ayaw pagtanom ug bisan unsang kahoy ingong sagradong poste*+ duol sa halaran nga inyong gihimo para kang Jehova nga inyong Diyos.

22 “Ayaw sab pagpatindog ug sagradong haligi para sa inyong kaugalingon,+ butang nga gidumtan ni Jehova nga inyong Diyos.