HAGGEO

1 Sa unang adlaw sa ikaunom nga bulan sa ikaduhang tuig sa pagmando ni Haring Dario, si Zorobabel+ nga anak ni Sealtiel, ang gobernador sa Juda, ug si Josue nga anak ni Jehozadak, ang hataas nga saserdote, nakadawat ug mensahe gikan kang Jehova pinaagi kang propetang* Haggeo,*+ nga nag-ingon:

2 “Kini ang giingon ni Jehova sa mga panon,* ‘Kini nga katawhan nag-ingon, “Wala pa moabot ang panahon nga tukoron* ang balay* ni Jehova.”’”+

3 Ug si propetang Haggeo+ nakadawat pag-usab ug mensahe gikan kang Jehova, nga nag-ingon: 4 “Kini ba ang panahon nga kamo magpuyo sa inyong nindot nga mga balay, samtang ang akong balay guba?+ 5 Karon kini ang giingon ni Jehova sa mga panon, ‘Tagda pag-ayo ang inyong ginahimo. 6 Daghan mog gipugas, apan diyutay ra mog naani.+ Nangaon mo, apan wala mo mabusog. Nanginom mo, apan wala mo matagbaw.* Nagsul-ob mog besti, apan gitugnaw gihapon mo. Kadtong gisuholan nagbutang sa iyang suhol diha sa puntil nga daghag buslot.’”

7 “Kini ang giingon ni Jehova sa mga panon, ‘Tagda pag-ayo ang inyong ginahimo.’

8 “‘Tungas kamo sa bukid ug pagdalag kahoy.+ Ug tukora ang akong balay,+ aron ako malipay niana ug mahimaya,’+ miingon si Jehova.”

9 “‘Nagdahom mog daghan, apan kamo diyutay rag nadawat; ug dihang gidala ninyo kana sa inyong balay, ako kanang gihuyop.+ Ngano?’ miingon si Jehova sa mga panon. ‘Kay ang akong balay guba, samtang ang matag usa kaninyo puliki sa pag-atiman sa inyong kaugalingong balay.+ 10 Busa ang kalangitan ibabaw kaninyo naghikaw sa ilang yamog, ug ang yuta naghikaw sa iyang abot. 11 Ug ako nagpahinabog hulaw sa inyong yuta ug kabukiran. Busa dunay kanihit sa lugas, bag-ong bino, lana, ug tanom. Kamo ug ang inyong kahayopan nag-antos. Ug ang tanan ninyong paghago nakawang.’”

12 Si Zorobabel+ nga anak ni Sealtiel+ ug si Josue nga anak ni Jehozadak,+ ang hataas nga saserdote, ug ang tibuok katawhan namati sa tingog ni Jehova nga ilang Diyos ug sa mga pulong ni propetang Haggeo, kay siya gipadala ni Jehova nga ilang Diyos; ug ang katawhan nahadlok kang Jehova.

13 Unya si Haggeo nga mensahero ni Jehova misulti niini nga mensahe ngadto sa katawhan sumala sa gisugo ni Jehova kaniya: “‘Ako nagauban kaninyo,’+ nag-ingon si Jehova.”

14 Busa gipalihok ni Jehova+ si Zorobabel nga anak ni Sealtiel, ang gobernador sa Juda,+ ug si Josue+ nga anak ni Jehozadak, ang hataas nga saserdote, ug ang tibuok katawhan; ug sila miadto ug gisugdan nilag trabaho ang balay ni Jehova sa mga panon, nga ilang Diyos.+ 15 Kadto maoy ika-24 nga adlaw sa ikaunom nga bulan sa ikaduhang tuig sa pagmando ni Haring Dario.+

2 Sa ika-21 nga adlaw sa ikapitong bulan, si propetang Haggeo+ nakadawat ug mensahe gikan kang Jehova, nga nag-ingon, 2 “Palihog pangutan-a si Zorobabel+ nga anak ni Sealtiel, ang gobernador sa Juda,+ ug si Josue+ nga anak ni Jehozadak,+ ang hataas nga saserdote, ug ang tibuok katawhan: 3 ‘Kinsa kaninyo ang nakakita sa himaya niini nga balay* kaniadto?+ Unsa nay inyong pagtan-aw niini karon? Wala na ba kiniy bili kon itandi kaniadto?’+

4 “‘Apan karon magmalig-on ka, Zorobabel,’ nag-ingon si Jehova, ‘ug magmalig-on ka, Josue nga anak ni Jehozadak, ang hataas nga saserdote.’

“‘Ug magmalig-on kamong tanang katawhan sa yuta,’+ nag-ingon si Jehova, ‘ug pagtrabaho mo.’

“‘Kay ako nagauban kaninyo,’+ nag-ingon si Jehova sa mga panon. 5 ‘Hinumdomi ang akong gisaad kaninyo dihang migula mo sa Ehipto,+ ug ang akong espiritu nagpabilin kaninyo.*+ Ayaw mog kahadlok.’”+

6 “Kay kini ang giingon ni Jehova sa mga panon, ‘Sa makausa pa​—⁠sa dili na madugay⁠—​akong uyogon ang kalangitan ug ang yuta ug ang dagat ug ang mamala nga yuta.’+

7 “‘Ug akong uyogon ang tanang kanasoran, ug ang bililhong* mga butang sa tanang kanasoran manulod;+ ug akong pun-on kining balaya sa himaya,’+ nag-ingon si Jehova sa mga panon.

8 “‘Ang plata* akoa, ug ang bulawan akoa,’ nag-ingon si Jehova sa mga panon.

9 “‘Ang himaya niining balaya sa umaabot mas labaw pa kay sa himaya niini kaniadto,’+ nag-ingon si Jehova sa mga panon.

“‘Ug niining dapita ako maghatag ug pakigdait,’+ nag-ingon si Jehova sa mga panon.”

10 Sa ika-24 nga adlaw sa ikasiyam nga bulan sa ikaduhang tuig sa pagmando ni Dario, si propetang Haggeo+ nakadawat ug mensahe gikan kang Jehova, nga nag-ingon: 11 “Kini ang giingon ni Jehova sa mga panon, ‘Palihog pangutan-a ang mga saserdote bahin sa balaod:+ 12 “Kon ang usa ka tawo magdalag balaang karne diha sa iyang besti, ug ang iyang besti makasaghid ug tinapay o linat-an o bino o lana o bisan unsang matang sa pagkaon, mahimo ba kining balaan?”’”

Ang mga saserdote mitubag: “Dili!”

13 Unya si Haggeo nangutana: “Kon ang usa nga hugaw tungod sa paghikap ug patayng lawas* makahikap sa bisan unsa niining mga butanga, mahimo ba usab kining hugaw?”+

Ang mga saserdote mitubag: “Kini mahimong hugaw.”

14 Busa si Haggeo miingon: “‘Ingon niana kini nga katawhan, ug ingon niana kini nga nasod sa akong atubangan,’ nag-ingon si Jehova, ‘ug ingon niana ang tanang buhat sa ilang mga kamot; bisan unsa nga ilang itanyag didto hugaw.’

15 “‘Apan karon, palihog, tagda kini pag-ayo sukad niining adlawa: Sa wala pa sugdi ang pagtukod pag-usab sa templo ni Jehova,+ 16 unsay kahimtang kaniadto? Dihang ang usa moadto sa tinapok nga lugas ug nagdahom nga makakuhag 20 ka takos, diha ray 10 ka takos; ug sa dihang ang usa moadto sa pug-anag bino aron mokuhag 50 ka takos nga bino, diha ray 20;+ 17 akong gihampak ang tanang buhat sa inyong mga kamot. Nagpahinabo kog makapagbang kainit, agup-op,+ ug ulan nga yelo, apan walay bisan usa kaninyo nga mibalik kanako,’ nag-ingon si Jehova.

18 “‘Palihog, tagda kini pag-ayo sukad niining adlawa, sukad sa ika-24 nga adlaw sa ikasiyam nga bulan, sukad sa adlaw nga gipahimutang ang pundasyon sa templo ni Jehova;+ tagda pag-ayo kini: 19 Duna pa bay lugas sa balay-tipiganan?*+ Wala pa mamunga ang punoan sa ubas, kahoyng igos, kahoyng granada, ug ang kahoyng olibo, dili ba? Sukad niining adlawa kamo akong panalanginan.’”+

20 Sa ika-24 nga adlaw sa bulan, si Haggeo nakadawat ug mensahe gikan kang Jehova sa ikaduhang higayon,+ nga nag-ingon: 21 “Ingna si Zorobabel, ang gobernador sa Juda, ‘Akong uyogon ang kalangitan ug ang yuta.+ 22 Akong pukanon ang mga trono sa mga hari ug laglagon ang gahom sa mga gingharian sa kanasoran;+ ug akong pukanon ang karo ug ang mga nagsakay niini, ug ang mga kabayo ug ang mga nagsakay niini mangapukan, ang tagsatagsa magpinatyanay pinaagig espada.’”+

23 “‘Nianang adlawa,’ nag-ingon si Jehova sa mga panon, ‘ako kang gamiton, Zorobabel+ nga anak ni Sealtiel,+ nga akong alagad,’ nag-ingon si Jehova, ‘ug ako kang himoon nga samag pangselyo nga singsing, kay ikaw ang akong gipili,’ nag-ingon si Jehova sa mga panon.”