IKADUHANG SULAT NI PEDRO

1 Gikan kang Simon Pedro, ulipon ug apostol ni Jesu-Kristo, ngadto kanila nga nakabaton ug pagtuo nga sama ka bililhon sa among pagtuo pinaagi sa pagkamatarong sa atong Diyos ug sa Manluluwas nga si Jesu-Kristo:

2 Hinaot ang dili hitupngang pagkamaayo* ug kalinaw modagaya pa kaninyo pinaagi sa tukmang kahibalo+ sa Diyos ug kang Jesus nga atong Ginoo, 3 kay ang gahom sa Diyos naghatag* kanato sa tanang butang nga atong gikinahanglan para sa kinabuhi ug sa atong debosyon sa Diyos pinaagi sa tukmang kahibalo sa Usa nga nagtawag kanato+ pinaagi sa iyang himaya ug pagkamaayo. 4 Pinaagi niining mga butanga gihatagan ta niyag* bililhon ug nindot kaayong mga saad,+ aron nga pinaagi niini kamo makaambit sa himaya sa Diyos ingong espiritung mga linalang,+ kay nakaikyas na mo sa pagkadunot sa kalibotan nga resulta sa daotang tinguha.*

5 Busa tungod niini, paningkamoti pag-ayo+ nga idugang sa inyong pagtuo ang pagkamaayo,+ sa inyong pagkamaayo ang kahibalo,+ 6 sa inyong kahibalo ang pagpugong sa kaugalingon, sa inyong pagpugong sa kaugalingon+ ang paglahutay, sa inyong paglahutay ang debosyon sa Diyos,+ 7 sa inyong debosyon sa Diyos ang inigsoong pagmahal, sa inyong inigsoong pagmahal ang gugma.+ 8 Kay kon kining mga hiyasa naa ninyo ug nagaawas, kini magpugong ninyo sa pagkahimong dili aktibo o dili mabungahon+ maylabot sa tukmang kahibalo bahin sa atong Ginoong Jesu-Kristo.

9 Kay kadtong wala niining mga hiyasa buta, nagpiyong sa iyang mga mata sa kahayag,*+ ug nalimot nga nahinloan na siya sa iyang kanhing mga sala.+ 10 Busa, mga igsoon, pagkugi pa gyod mo aron maseguro ninyo ang inyong pagkatinawag+ ug pagkapinili, kay kon padayon mong mohimo niini dili gyod mo mapakyas.+ 11 Sa pagkatinuod, pinaagi niini panalanginan mo pag-ayo ug makasulod sa walay kataposang Gingharian+ sa atong Ginoo ug Manluluwas nga si Jesu-Kristo.+

12 Busa andam ko kanunay nga pahinumdoman mo bahin niini, bisag nahibalo na mo niini ug lig-on na sa kamatuoran nga naa kaninyo. 13 Apan giisip nako nga hustong awhagon mo pinaagig mga pahinumdom,+ samtang nia pa ko niini nga tabernakulo,*+ 14 kay nahibalo ko nga hapit na nakong biyaan kini nga tabernakulo, sumala sab sa gipatin-aw kanako sa atong Ginoong Jesu-Kristo.+ 15 Himoon nako kanunay ang akong maarangan aron inigbiya nako, mahinumdom* mo niining mga butanga.

16 Wala gyod namo ibase sa bakak nga mga estorya nga hinimo sa tawo ang among gipahibalo kaninyo bahin sa gahom ug presensiya sa atong Ginoong Jesu-Kristo, kay saksi mi sa iyang kahalangdon.+ 17 Kay siya nakadawat ug dungog ug himaya gikan sa Diyos nga Amahan. Nahitabo ni dihang ang tinubdan sa dakong himaya miingon kaniya: “Kini mao ang akong Anak, ang akong gihigugma, nga akong giuyonan.”+ 18 Oo, nadungog namo kini gikan sa langit samtang kauban namo siya sa balaang bukid.

19 Busa mas kombinsido ta nga ang tanang tagna matuman gayod, ug maayo ang inyong ginahimo nga inyo kining gihatagag pagtagad nga samag lampara+ nga nagsiga sa ngitngit nga dapit (hangtod mobanagbanag na ug ang bituon sa buntag+ mosubang) sa inyong kasingkasing. 20 Kay nahibalo gyod mo nga walay tagna sa Balaang Kasulatan nga naggikan sa kaugalingong interpretasyon. 21 Kay walay tagna sukad nga midangat pinaagi sa kabubut-on sa tawo,+ apan ang mga tawo nagsulti sa mensahe sa Diyos samtang sila gigiyahan* sa balaang espiritu.+

2 Apan sama nga dihay bakak nga mga propeta* taliwala sa katawhan sa Israel, duna sab unyay bakak nga mga magtutudlo taliwala kaninyo.+ Sila hilom nga magpasulod ug makadaot nga mga sekta ug maglimod pa gani sa tag-iya nga nagpalit nila,+ nga moresulta sa ilang kalit nga kalaglagan. 2 Daghan sab ang mosunod sa ilang walay kaulaw nga paggawi,*+ ug tungod nila ang dalan sa kamatuoran mapasipalahan.+ 3 Dugang pa, tungod sa ilang kahakog pahimuslan mo nila pinaagi sa pagsultig bakak. Apan ang paghukom kanila, nga dugay nang gidesisyonan,+ dili malangan, ug ang ilang kalaglagan seguradong moabot.+

4 Ang Diyos wala gyod magpugong sa pagsilot sa mga anghel nga nakasala.+ Hinuon, iyang gitambog sila sa Tartaro*+ ug gikadenahan* sa grabeng kangitngit aron igahin sa paghukom.+ 5 Ug wala siya magpugong sa pagsilot sa karaang kalibotan.+ Hinuon giluwas niya si Noe, nga magwawali sa pagkamatarong,+ ug ang pito pa+ dihang iyang gipalunopan ang kalibotan sa dili diyosnong katawhan.+ 6 Gisunog sab niya ang mga siyudad sa Sodoma ug Gomora hangtod nga naabo kini.+ Pinaagi sa pagsilot niana, iyang gipakita kon unsay dangatan sa mga tawong dili diyosnon.+ 7 Ug iyang giluwas ang matarong nga si Lot,+ kinsa naguol pag-ayo tungod sa walay kaulaw nga paggawi* sa masinupakong katawhan⁠— 8 kay kining matarong nga tawo adlaw-adlaw nga naguol tungod sa daotang mga buhat nga iyang nakita ug nadungog samtang nagpuyo uban kanila. 9 Busa nahibalo si Jehova* kon unsaon pagluwas gikan sa pagsulay kadtong matinumanon kaniya,+ apan gigahin niya ang mga dili matarong aron laglagon* sa adlaw sa paghukom,+ 10 ilabina kadtong nagtinguha sa paghugaw sa lawas sa uban+ ug nagtamay sa awtoridad.+

Kay mapangahason ug mabuotbuoton, sila dili mahadlok nga pasipalahan ang mga gipasidunggan sa Diyos,* 11 samtang ang mga anghel, bisag labaw sa kusog ug gahom, wala mag-akusar kanila pinaagig mapasipalahong mga pulong tungod sa ilang pagtahod kang Jehova.*+ 12 Apan samag way hunahuna nga mga hayop nga ipanganak aron dakpon ug laglagon, kining mga tawhana nagsulti nga mapasipalahon bahin sa mga butang nga wala silay nahibaloan.+ Sila malaglag tungod sa ilang daotang dalan. 13 Sila silotan tungod sa ilang daotang mga buhat.

Giisip nila nga makapalipay ang pagpatuyang sa maluhong pagkinabuhi+ bisag adlawng dako. Mga buling sila ug mga lama, nga nagpatuyang sa pagkalipay sa ilang malimbongong mga pagtulon-an samtang nagkombira uban kaninyo.+ 14 Ang ilang mga mata punog pagpanapaw+ ug dili sila makabiya sa sala, ug ilang ginahaylo ang mga huyang ug pagtuo. Ang ilang kasingkasing nabansay sa kahakog. Tinunglo sila nga mga anak. 15 Kay mibiya sa tul-id nga dalan, sila nangasaag. Misubay sila sa dalan ni Balaam,+ ang anak ni Beor, nga nahigugma sa ganti sa paghimog daotan,+ 16 apan gibadlong tungod sa iyang paglapas sa kon unsay husto.+ Ang kabuangan niini nga propeta gibabagan sa asno nga misulti samag tawo.+

17 Sila mga tubod nga walay tubig ug mga gabon nga gipalid sa kusog nga bagyo, ug gigahin kanila ang kinagrabehang kangitngit.+ 18 Nagsulti silag makapadaning mga pulong apan walay pulos. Ug pinaagi sa mga tinguha sa unod+ ug walay kaulaw nga paggawi,* ilang ginahaylo kadtong bag-o pang nakalingkawas sa makasasalang pagkinabuhi.+ 19 Sila nagsaad kanilag kagawasan, apan sila mismo mga ulipon sa sala;+ kay kon ang usa madaog sa laing tawo, siya ulipon niya.*+ 20 Kon nakaikyas na sila sa mga kahugawan sa kalibotan+ pinaagi sa tukmang kahibalo sa Ginoo ug Manluluwas nga si Jesu-Kristo apan malangkit sila niini pag-usab ug madaog niini, mas daotan pa kana kay sa kaniadtong wala pa sila mahibalo sa kamatuoran.+ 21 Maayo pag wala na lang nila bug-os mahibaloi ang dalan sa pagkamatarong kay sa mahibalo sila unya motipas sa balaang sugo nga ilang nadawat.+ 22 Nahitabo kanila kini nga panultihon: “Ang iro mikaon sa iyang sinuka, ug ang baboy nga naligoan na mibalik pagligid sa lapok.”+

3 Minahal nga mga igsoon, ikaduhang sulat na nako ni ninyo, ug sama sa akong unang sulat, ginapukaw nako ang inyong katakos sa paghunahuna pinaagig pahinumdom,+ 2 aron mahinumdom mo sa gisulti kaniadto* sa balaang mga propeta ug sa sugo sa Ginoo ug Manluluwas pinaagi sa inyong mga apostoles. 3 Una sa tanan, kamo nahibalo nga sa kataposang mga adlaw moabot ang mga mabiaybiayon nga magsultig mga biaybiay, nga magbuhat sa ilang mga tinguha+ 4 ug moingon: “Asa na man ning gisaad nga presensiya niya?+ Aw, sukad nga ang atong mga katigulangan nangatulog sa kamatayon wala ray kausaban, parehas ra ang kahimtang sukad sa sinugdan sa kalalangan.”+

5 Kay ilang gituyo nga balewalaon kini nga kamatuoran, nga kaniadto dihay mga langit ug yuta nga lig-ong nagbarog ibabaw sa katubigan ug sa taliwala sa katubigan pinaagi sa pulong sa Diyos;+ 6 ug pinaagi niana ang kalibotan niadtong panahona nakaagom ug kalaglagan dihang kini gilunopan sa tubig.+ 7 Apan pinaagi sa mao gihapon nga pulong, ang mga langit ug ang yuta nga naglungtad karon gigahin para sa kalayo. Kini gigahin para sa adlaw sa paghukom ug sa kalaglagan sa mga tawong dili diyosnon.+

8 Apan matikdi ninyo mga minahal, nga ang usa ka adlaw ni Jehova* samag 1,000 ka tuig ug ang 1,000 ka tuig samag usa ka adlaw.+ 9 Si Jehova* dili langayan sa pagtuman sa iyang saad,+ sama sa gihunahuna sa ubang tawo, apan nagpailob siya ninyo kay dili niya gusto nga naay malaglag kondili gusto niya nga ang tanan maghinulsol.+ 10 Apan ang adlaw ni Jehova*+ moabot nga samag kawatan,+ diin ang mga langit mahanaw+ uban ang kusog nga dahunog,* apan ang mga elemento mangatunaw sa grabeng kainit, ug ang yuta ug ang mga buhat diha niini madayag.+

11 Sanglit kining tanang butang tunawon man niining paagiha, tagda kon unsay angay ninyong buhaton maylabot sa balaang panggawi ug mga buhat nga nagpakitag debosyon sa Diyos, 12 samtang nagpaabot ug naghunahuna kanunay sa presensiya sa adlaw ni Jehova,*+ nga pinaagi niana ang mga langit malaglag+ sa kalayo ug ang mga elemento mangatunaw sa grabeng kainit! 13 Apan dunay bag-ong mga langit ug bag-ong yuta nga atong gipaabot sumala sa iyang saad,+ ug molungtad* niini ang pagkamatarong.+

14 Busa mga minahal, sanglit nagpaabot mo niining mga butanga, buhata ang inyong maarangan aron sa kataposan makaplagan mo niya nga walay buling ug walay lama ug may malinawong relasyon kaniya.+ 15 Dugang pa, isipa ang pailob sa atong Ginoo ingong kaluwasan, sama nga ang atong minahal nga igsoong si Pablo misulat sab kaninyo sumala sa kaalam nga gihatag kaniya,+ 16 nga nagsulti bahin niining mga butanga sa tanan niyang sulat. Apan may pipila ka butang niini nga lisod sabton, nga ginatuis sa mga walay kahibalo* ug sa mga huyang ug pagtuo, sama sa ginahimo nila sa ubang bahin sa Balaang Kasulatan, nga moresulta sa ilang kalaglagan.

17 Busa minahal nga mga igsoon, kay nahibalo na mo niini, pagbantay mo aron dili mo masaag uban nila pinaagi sa kasaypanan sa masinupakong katawhan ug mawad-an sa inyong kalig-on.+ 18 Apan padayon mo sa pag-uswag sa dili hitupngang pagkamaayo* ug sa kahibalo bahin sa atong Ginoo ug Manluluwas nga si Jesu-Kristo. Iya ang himaya karon ug hangtod sa hangtod. Amen.