Panghunahuna sa Tagasulod sa Kalibotan sa Pornograpiya
KARONG adlawa ang pornograpiya maoy mauswagong negosyo nga naglangkit sa pinakyaw nga paggamag libro, sinawng mga magasin, videocassettes, mga pelikula, mga programa sa cable television, bisan dial-a-porn nga mga mensahe sa telepono. Sa Tinipong Bansa ang gibanabana nga kita niini mokabat sa gikan sa $7 bilyon ngadto sa $8 bilyon sa usa ka tuig.
Pila ka tuig miagi, ang kanhi tiggamag pornograpiya si Burton Wohl misulat sa tin-awng kabatbatan niining mangil-ad nga industriya diha sa Harper’s nga magasin. Sa pagtawag sa iyang dapit sa trabaho nga usa ka “porno-fac,” gipadayag ni Wohl nga “kadto tinuod nga pabrika nga nagpagawas ug tinonelada, tinaraktarak nga mga butang sa matag bulan.” Ug miingon siya nga “kadto dako kaayo, luag kaayo, nga milukop sa daghang akre, nga gisulod sa daghang tinukod, nga ang pipila ganayon, ang uban nakatag latas sa un-kuwarto sa milya nga radiyos, ngatanan nahimutang sa industriyal nga sona.”
Unsang matanga sa katawhan ang mga modelo sa maong “porno-fac”? Ania ang pagbatbat niya kanila: “Ang kadaghanan sa katawhan nga makita diha sa mga magasin—dili akong departamento—maoy nahisalaag nga mga kalag. Dili lang nga sila dili na mobati tungod sa usa o kapin pang droga, apan sila mao ang matang sa laglom ug mga mata, mahandurawon, wala sa kaugalingon nga batan-ong sagad hikit-an sa usa—ug gihapon hikit-an—nga nagapalutawlutaw ibabaw sa California ug nagapadulong, nga daghan kaayo kanila, ug dili gayod malukmay, sa kinalabwang kalibganan.”
“Ang pornograpiya maoy hugaw,” misugid siya, “usa ka mantsa, dili lang nga dili mapala kondili dili makunhoran sa ilalom” sa kon unsay gigamit nga taklap niini, mahimong kini “arte, antropolohiya, sosyolohiya, relihiyon, sikolohiya.” Ingong tagasulod, giangkon ni Wohl nga “ang pornograpiya, sama sa basurang tubig, mosuhop sa tanang matandog niini. Mopadugo, oo, kay ang pagpaagas sa dugo, ang kapintasan, mao ang pasukaranan sa pornograpiya ug bisan ang dili matagbaw nga marquis [de Sade nga nagkalipay sa terible nga kapintasan] dili makalapaw niana. Ang gahom nagadepende sa kapintasan, pag-ula sa dugo. Ug ang gahom mao ang gisaulog, gilamdagan—labaw sa tanan, gipakalabaw sa pornograpiya.”
Gibiyaan ni Gn. Wohl ang maong mangil-ad nga negosyo tapos sa usa ka tuig tungod kay, sumala sa iyang gitaho, “Dili ko na kadto mahimo. Ako naghunahuna nga ang pornograpiya maoy dili-pino nga butang, hugaw, nga ang among ganansiya maoy gikan sa kahuyangan sa tawo, sakit, bisan trahedya.” Siya mihinapos, “Akong nasayran nga ang akong gibayad niana nagkataas sa tanang panahon. Kana dili takos.”
Kon unsa ka maayo kining sulod nga paghulagway sa negosyo sa pornograpiya mohaom kaayo sa kabatbatang makita sa Balaang Bibliya sa Roma 1:24, 28 sa pagkadaotan sa mga tawong nagasalikway sa hataas moral nga mga sukdanan sa Diyos: “Kana ang hinungdan sila gitugyan sa Diyos ngadto sa ilang mahugaw nga mga kalipay ug mga buhat nga pinaagi niana ilang gipakaulawan ang ilang mga lawas. . . . Sa laing mga pulong, sanglit sila midumili sa pagsabot nga makataronganon ang pag-ila sa Diyos, ang Diyos nagtugyan kanila ngadto sa ilang dili-makataronganong mga hunahuna ug sa ilang mangil-ad nga mga kagawian. Ug busa sila natuhop sa tanang matang sa pagkadaotan, sa kadunotan.”—The Jerusalem Bible.