“Maayong mga Ulan” sa Karaang Gresya
Ang mga sayaw sa ulan ug mga pag-ampo sa nagkalainlaing porma makita halos sa tanang karaang mga tawo, ug lakip na niini ang mga Grego. Taliwala sa ilang daghan kaayong mga rituwal, ang usa nga popular sa mga mag-uuma mao ang perperuna, usa ka pangadyi ngadto sa mga diyosdiyos alang sa “maayong mga ulan.”
Ang perperuna maoy usa ka bulak nga amapola nga manubo sa tanang banika sa panahon sa tingpamulak sa Gresya. Apan ang tingpamulak maoy panahon usab sa ulan aron adunay dagayang ani sa panahon sa tinghunlak. Kon dili moabot ang ulan, dakong kadaot ang moresulta niini alang sa mga taga balangay. Sa pagpangaliyopo sa mga diyosdiyos sa ilang pabor ug pananlangin—ug sa ilang gasa nga ulan—himoon sa mga mag-uuma sa baryo ang ilang perperuna nga rituwal.
Sa pagsaulog tigomon ang mga batan-ong dalaga sa baryo sa lokal nga plasa. Pilion ang usa kanila ug sul-oban samag perperuna. Ingong paghangyo sa mga kaluoy sa mga diyosdiyos, sagad ang pobre ilong tuwapos nga batan-ong dalaga ang pilion. Sul-oban siyag daang senina ug adornohan sa malubaylubayng mga sanga, mga dahon, mga bulak, ug lunhawng sagbot hangtod nga maputos siya gikan sa ulo ug sa tiil. Baga kaayo ang tabon nga halos dili siya makakita lapos niini. Ngani, agakon ang perperuna libot sa baryo nga ang panagway daw sa naglakawng tanom.
Sumala sa tradisyon, ang perperuna maoy simbolo sa napagbang yuta. Sa pagtagbaw sa iyang kauhaw aron makahatag siyag bunga, agakon siya sa mga taga baryo gikan sa balay ug balay, uban sa mga batan-ong dalaga nga magsunod kaniya, manag-awit sa makusog ning awita:
Perperuna galibod
Lanog nag-ampo sa Diyos.
Ginoo, pagpaulan
Buhia ming tanan,
Aron binhi motubo,
Ug ang tanom manubo.
Inig-abot sa prosesyon sa usa ka balay, tagboon sa ginang sa panimalay ang perperuna sa pagsablig ug tubig kaniya samtang magsinggit: “Maayong mga ulan! Maayong mga ulan!” Human nga mabasa, motubag ang perperuna pinaagi sa pag-uyog sa iyang lawas aron ang tubig sa mga sagbot ug sa dahon mopatak ug mahulog samag ulan.
Sa kataposan, human nga makalibod sa baryo, dalhon sa mga taga baryo ang perperuna sa usa ka sapa. Didto ilang ilusbog siya sa tubig sa makatulo, samtang managsinggit: “Maayong mga ulan! Maayong mga ulan!”
Hangtod sa unang gubat sa kalibotan, ang kustombre sa perperuna kaylap nga gipraktis sa Gresya. Gisaulog kini sa nagkalainlaing dapit ubos sa kaamgid nga mga ngalan sama sa paparuna, perperitsa, ververitsa. Bisag kining kustombreha gituohan nga nawala na gawas sa halayong mga baryo, diha sa kadaghanang dapit kini gipulihan na pinaagi sa giuyonan sa iglesya nga relihiyosong mga prosesyon alang sa samang katuyoan. Ang paglangkit sa madyik, patuotuo, ug relihiyon dulot nga pagkagamot sa mga kinabuhi sa mga tawo bisan sa gitawag nga Kristiyanong kayutaan.