Unahon ang Trabaho—Makatagbaw Ba?

Sa Japan, ang mga suweldado sagad ibalhin sa bag-ong mga lugar nga hatagag promosyon ug taas nga suweldo. Apan sagad, duyog niini ibalhin ang ulo sa panimalay sa laing siyudad nga halayo sa iyang pamilya. Lakip sa mga butang sa dili pagbalhin sa pamilya mao: may tigulang nga mga ginikanan, mabalda ang pagtuon sa mga bata, ug bag-ong pinalit nga balay nga gipuy-an sa pamilya. Apan dili maayo ang mga resulta: bungkag nga pamilya, diborsiyo, ug paghikog. Gitawag kini sa Mainichi Daily News nga “‘Dihimsog’ nga Paagi sa Kinabuhi Alang sa Kaayohan sa Kompaniya.”

Ang bag-ong mga surbi nagpakita nga dugang ug dugang mga trabahante mibati nga dili ang kompaniya ang kinahanglang unang hatagan ug pagtagad. Unahon ba nila ang pamilya? Sa pagkatinuod, daw mopatim-aw nga dunay inklinasyon ang Hapones sa paggugol ug mas daghang panahon sa personal nga mga pangagpas nga bulag sa pamilya.

Nga dili makatagbaw ang presenteng paagi sa kinabuhi napabanaag sa rekord sa gidaghanon sa mga paghikog sa Japan sa 1983. Ang labing dakong pagsulbong sa paghikog sukad gisugdan ang pagtagog rekord sa 1947, 25,202 ang nagpatay sa ilang kaugalingon. Halos katunga sa mga lalaking naghikog anaa sa ilang panuigong 40 ug 50. Busa, usa ka editoryal sa Mainichi Daily News misugyot nga ang “mga lalaki kinahanglang magpalibre sa ilang kaugalingon sa paagi sa kinabuhi nga gihikay sumala sa paagi sa ‘organisasyon.’”

Sa kasukwahi, ang mga lalaki nga nagtuon sa Bibliya uban sa ilang mga pamilya nahimong maayong mga ginikanan ug nakabaton ug mas matagbawon nga panimalaynong kinabuhi. Samtang maayo silang mga magtatagana, sila nakakat-on kon unsa ang angay unahon ug, ingong resulta, nakatagamtam ug makahuloganong mga kinabuhi uban sa mga palaabuton nga dunay walay kataposang mga kaayohan.