Panid Dos

Ang Iguaçú Falls, ang usa sa kinaiyanhong mga katingalahan sa kalibotan. Dili layo gikan sa 200 ug 270 ka piye nga gitas-on, 2 1/2 ka milya nga gilaparon, nga may nagbusagak nga 450,000 ka kubikong piye nga tubig sa matag segundo sa nagkalainlaing 275 ka busay, ang Iguaçú (ē-gwä-sōōʹ) nagkinabuhi sa kahulogan sa ngalan niini, “dakong tubig.”

Ang Busay maoy utlanan sa Brazil ug sa Argentina. Ang duha ka nasod nakahimog nasyonal nga mga parke aron sa pagtipig sa katahom niini. Ang tagsaong mga tanom lanubong nanubo diha sa pinong mga taligsik. Ang mga Jaguar, ocelot, tapir, ug usa nagsuroysuroy sa palibot nga lasang. Ang nagkalainlaing matang sa langgam makalingaw sa mata. Ang mga panganod sa mga kabakaba nanaglupadlupad ug motugdon usahay sa mga bisita. Ang mga balangaw nagapangidlap diha sa pinong mga talaksik nga nag-arko gikan sa nagbuhagay nga tubig.

Hangtod kanus-a nga bihagon sa talagsaong katahom sa Iguaçú ang 3,000,000 ka mga bisita niini sa usa ka tuig? Karon aduna nay hungihong nga gamiton ang mga Busay aron makataganag koryente. Daoton ba sa tawo ang katahom sa Iguaçú, sama sa iyang nahimo diha sa kadaghanan sa planetang Yuta? O iya bang tipigan kining “dakong tubig” nga makalipay ug makapatingala sa iyang mga anak ug sa ilang mga anak?