Makita Diha sa Imong Buhok

ANG sukdanan sa paagi sa pagsusi sa paggamit sa droga mao ang pag-analisar sa sampol sa ihi. Apan dili pa dugay ang National Institute of Justice, usa ka ahensiya sa tigdukiduki sa Departamento sa Hustisya sa T.B., nagagasto sa usa ka pagtuon sa potensiyal nga paggamit sa pagtuki sa buhok sa pagtino kon tiggamit ba ug droga ang usa ka tawo. Bisan pa nga ang mga siyentipiko sa katibuk-an nagtuo nga dugang pagdukiduki ang gikinahanglan sa dili pa nila saligan ang pagdukiduki sa usa ka sampol sa buhok sa pagtino sa paggamit ug droga, ang paagi dayag dunay mga bentaha.

Ang mga droga sama sa cocaine ug heroina, pananglitan, dili makita diha sa ihi bisan sa pipila ka adlaw human sa paggamit. Apan kining maong mga droga makita diha sa pagdukiduki sa buhok sa pila ka bulan sa ulahi. Tungod kini kay ang mga nahibilin sa droga magpabilin nga masukip sa buhok sa dihang motubo kini. Si Bernard Gropper sa National Institute of Justice miingon: “Ang buhok dunay bentaha sa taas-ug-tagal nga memoriya. Kini maoy permamente nga rekord, sama sa mga singsing sa kahoy.” Ang otso-sentimetros nga lugas sa buhok mohatag ug unom ka bulan nga kasaysayan, sanglit ang buhok sa ulo motubo man sa gikusgong usa ka sentimetros sa usa ka bulan.

Laing bentaha mao nga ang mga tawo dili makalikay nga makit-an ang mga droga diha sa pagdukiduki sa buhok nga sama ka sayon sa mahimo niini diha sa pagdukiduki sa ihi. Ang pag-inom ug daghang tubig sa dili pa mohatag ug sampol sa ihi, pananglitan, makapausab sa pag-eksamin sa ihi. Apan ang pagdukiduki sa buhok lahi. Sa pagkamatuod, ang gisusi nga pipila ka lugas sa buhok nga ginaingong gikan pa sa ulo sa ika-19ng siglong Britanikong magbabalak nga si John Keats nagbutyag nga siya migamit ug daghang opium sa naghinapos ang iyang kinabuhi. Kini nagsugyot nga gigamit ang droga alang sa katuyoan sa pagtambal, sanglit si Keats himalatyon man tungod sa tesis.