Ang Taj Mahal—Handumanan sa Gugma

Gibatbat kini ingong matahom nga pahiyas, ingong awit sa gugma diha sa bato, ingong labing nindot nga lapida sa usa ka nagbangotang bana alang sa iyang namatayng asawa.

Usa ka gatos kan-uman ka kilometros silangan sa Delhi, sa amihanang India, mao ang siyudad sa Agra, diin kining bililhon kaayong Muslim nga arkitektura nagabarog—ang Taj Mahal. Kining matahom nga tinukod, nga gidesinyo sa usa ka Turkong arkitekto ug ginama sa puting marmol, nagabarog nga handumanan sa gugma ni Shah Jahan alang sa iyang paboritong asawa, si Mumtaz Mahal, kinsa namatay niadtong 1631. Gidangtag duolag 20 anyos ang pagtukod sa lubong ug nalangkit ang moa 20,000 ka trabahante.

Ang Muslim nga impluwensiya tin-awng makita diha sa yagpisong mga panting minoros o minaret nga moabot sa gihabogong 40.5 metros ug sa mga tekstong kinuha gikan sa Qur’ān nga nagadayandayan sa mga bungbong sa gawas. Ang linaw nga langoyanan nagahatag ug romantikong hulagway sa musoleo, ilabina kon hayag ang bulan o sa pagsubang ug pagsalop sa adlaw.

Ang halalom nga gugma sa Shah alang sa iyang asawa nagapahinumdom sa usa sa mga pahayag sa gugma ni Haring Solomon alang sa dili-madaning Sulamitang dalaga nga magbalantay, nga makita sa Bibliya sa Awit ni Solomon.