Panid Dos

Sulod niining sigloha, ang siyensiya nakapauswag kaayo sa atong kahibalo bahin sa kinaiyanhong kalibotan sa atong palibot. Ang mga teleskopyo niini nakabutyag ug makalilisang nga mga kahibudnganan sa mabituonong kalangitan, sama nga nakabutyag ang mga mikroskopyo niini sa kahibulongang mga kakomplikado sa mga molekula ug sa mga atomo. Ang mga katingalahan sa desinyo sa mga tanom ug sa kahayopan, ang kaalam nga gipabanaag sa atong pagkamakalilisang ug sa pagkakatingalahang pagkahimong mga lawas​—kini nga kahibalo miabot kanato pinaagi sa mga nadiskobrehan sa kugihang mga siyentipiko. Kita mapasalamaton.

Apan adunay laing kiliran ang siyensiya. Dili ang tanang mga tighimo niini nakaabot sa larawan sa tumong, maluloy-ong mga tigpangita sa kamatuoran, bisan kon asa pa kini mosangpot. Adunay daghan kaayong mga siyentipiko kinsa nagapili ug materyal nga mosuportar sa ilang teoriya ug isalibay kanang mosumpaki. Ilang ireport ang mga pagtuon nga wala gayod nila himoa ug ang mga eksperimento nga wala gayod nila buhata, ug magmugnamugna sila nianang dili nila mapamatud-an. Ilang sundogon ang mga sinulat sa kaubang mga siyentipiko. Daghan ang nagapangangkon nga maoy tagsulat sa mga artikulo nga wala gayod nila tukia ug tingali wala gayod makita!

Ang dayag nga panglimbong tingali talagsa ra, apan ang pipila nga nagamaniobra sa impormasyon nga gihisgotan sa ibabaw komun. Labi pang komun, hinunoa, mao ang laing duha ka matang sa panglimbong, ang duha naglangkit ug malimbongong propaganda. Tukion sa upat ka artikulong mosunod ang suliran.