Unsay Pag-isip Nimo sa mga Tawo sa Laing Rasa?

“Ang mga kinagisag ulo sa Amerika, sama sa dinamikong mga kinagisag ulo sa Uropa, maoy matang-mamumuo Aryan nga mga batan-on. Supak kami sa kapitalista ug komunistang hugaw nga nagadaot sa among Aryan nga rasa. . . . Ang parasitong Hudiyong rasa mao ang lintunganay sa among problema.”

KANA ang gipahayag sa usa ka palid sa basahon gikan sa nagsukad-Chicago nga gang sa mga kinagisag ulo o skinheads. Kini sila maoy mga batan-on nga nagkagis sa ilang mga ulo, nagsul-ob sa linain bisteng binugoy nga binordahan sa mga swastika, nagdayeg sa kapintasan, nagpatalinghog sa ‘white power’ nga musika, ug nagtamay sa mga Hudiyo, mga itom, ug sa ubang mga minoriya.

Ang lider sa usa ka gang nga gitawag Romantic Violence nagsulti sa usa ka panagkatigom sa rasistang puting mga lider nga ang iyang grupo “nagabarog alang sa gubat,” ug siya midugang: “Ako usa ka tawong mapintason. Gihigugma ko ang rasa nga puti, ug kon ikaw may gihigugma ikaw mao ang labing mapintasong tawo sa yuta.”

Kon bahin sa mga pundokpundok, ang skinheads diyutay ra. Ang ilang mga pagtuo maoy hinobra. Diyutay ra ang mga tawo karong adlawa ang sama ka dayag nga panatiko ug agresibo sa ilang panglantaw. Bisan pa niana, daghan ang sekretong nagahambin ug pagdumot sa mga tawo sa laing rasa ug walay pagsalig kanila. Sa tibuok kalibotan, ang mga tawo pagahukman sumala sa ambihas sa ilang mga mata o kolor sa ilang panit. May pasikaranan ba kini? May kinaiyanhon bang kalainan sa pangutok o taras taliwala sa mga rasa? Sa pagtubag niining mga pangutanaha, atong susihon pag-una sa unsang paagi ang lainlaing mga pagtuo bahin sa rasa naugmad latas sa kasiglohan.