Sa Unsang Paagi Makasukol Ako sa Pagpit-os sa Isigkaingon?
Usa ka sulat gikan sa usa ka polis sa Chicago, U.S.A., nagailustrar sa kahinungdanon sa pagkahibalo sa tubag. Siya misulat:
“Niadtong Enero 15, 1990, gihikay ko ang 18-anyos nga piniriso nga gibalik sa Chicago gikan sa Mississippi tungod sa pagpuga sa bilanggoan. Ang usa ka bahin sa maong paghikay mao ang pagkuha sa tanang gamit sa piniriso. Duna siyay libro nga Mga Pangutanang Gisukna sa mga Batan-on—Mga Tubag nga Mosaler.
“‘Gibasa ba nimo kining libroha?’ nangutana ako.
“‘Oo,’ siya mitubag. ‘Samtang nagtagotago ako sa Mississippi, nagtrabaho ako sa usa ka umahan, ug gihatagan ako sa duha sa mga Saksi ni Jehova niining libroha.’ Unya misugod siya paghilak, kusog nga midangoyngoy. Sa matag dangoyngoy, siya miingon: ‘Daghang higayon nga nabasa nako kining libroha, ug ang kapitulo nga gipunayan nakog basa mao ang bahin “Sa Unsang Paagi Makasukol Ako sa Pagpit-os sa Isigkaingon?”’ Siya miduang: ‘Kon nabatonan ko pa lamang unta kining impormasyona sa tulo o upat ka tuig nang milabay, wala unta ako dinhi karon.’
“Gidala ang piniriso, ug nabasa nako ang report sa polis ug ang iyang gitug-an sa polis. Didto kini ang iyang giingon: ‘Gisugo ako sa lider sa akong gang sa pag-adto didto sa karsada ug sa pagposil sa usa ka membro sa kontra nga gang nga namaligyag cocaine sa among balwarte. Gisunod ko ang gisugo kanako. Nahadlok ako nga hunahunaon sa ubang mga membro nga dili ako makahimo niadto. Gusto ko nga ila akong dawaton.’
“Kining 18-anyos nga piniriso gipasakaan ug sumbong nga pagpatay, ug kon mahukmang sad-an, ibutang siya diha sa mga patyonon tungod sa paghimo sa gisugo kaniya sa iyang isigkaingon.”
Ang Bibliya nagtanyag ug kasaligang mga giya ug maalamong tambag sa kadaghanang mga problema karong adlawa. Kon buot ka ug dugang impormasyon o usa ka libreng pagtuon sa Bibliya, palihog pagsulat sa Watch Tower, P.O. Box 2044, 1099 Manila, o sa tukmang direksiyon nga nalista sa panid 5.