Adlaw ni Valentino—Diin ba Kini Gikan?

IKAW ba sukad nakapadala o nakadawat ug usa ka valentino, usa ka kard o gasa? Sa daghang nasod batasan ang pagpadala niana alang sa Pebrero 14, ang Adlaw ni Valentino. Gituohan nga kini usa ka adlaw nga saulogon sa mga naghigugmaay. Apan sa unsang paagi nagsugod ang batasan?

Ang Brewer’s Dictionary of Phrase and Fable nag-ingon: “Valentino, Sto. Usa ka pari sa Roma nga napriso tungod sa pagtabang sa gilutos nga mga Kristohanon. Siya nahimong usa ka kinabig ug, . . . siya giposposan hangtod namatay. Ang iyang adlaw mao ang 14 Pebrero. . .

“Ang karaang batasan sa pagpilig mga Valentino duna lamay wala tuyoa nga kalabotan sa santos, nga sa paninugdan usa lang ka batasang nahibilin gikan sa karaan Romanhong Lupercalia . . . o gikan sa pagkalangkit sa panahon sa pakigsanay sa mga langgam. Natiman-an kini pinaagi sa paghatag ug mga regalo ug karong adlawa pinaagi sa pagpadalag kard nga niana gihulagway ang mga kupido, tinusokang mga kasingkasing, ubp.”

Ug unsay kalabotan ni Kupido sa Adlaw ni Valentino? Ang samang basahon nagaingon: “Kupido (Lat[in] cupido, kaibog, gugma). Ang Romanhong diyos sa gugma, nga nalangkit sa Gregong Eros. Sagad gihawasan siya sa usa ka guwapo may-pako nga batang lalaki, nga piniringan, ug nagdalag usa ka pana ug mga udyong.”

Ang The World Book Encyclopedia nagahatag ug dugang impormasyon, nga nagatanyag ug lainlaing mga teoriya bahin sa sinugdanan sa mga batasan sa Adlaw ni Valentino. “Sumala sa usa ka estorya, ang Romanhong Emperador Claudio II sa katuigang A.D. 200 nagdili sa mga batan-ong lalaki sa pagminyo. Nagtuo ang emperador nga ang mga ulitawo mahimong mas maayong mga sundalo. Usa ka pari nga ginganlang si Valentino misupak sa mando sa emperador ug sekretong nagkasal sa batan-ong mga parisan. . . . Daghang estorya nag-ingon nga si Valentino gipatay sa Pebrero 14 mga A.D. 269. Sa A.D. 496, si Santo Papa Gelasio I nagngalan sa Pebrero 14 nga Adlaw ni San Valentino.”

Bisan unsay tinuod nga kagikanan sa batasan, dayag kini nagsugod sa mga karaang paganong tinuohan ug sa listahan sa gitawag “mga santos” sa Kakristiyanohan. Ang Adlaw ni Valentino maoy laing pasangil sa komersiyal nga pagpanghimulos sa kasagaran way-alamag nga katilingban.​—2 Corinto 6:14-18.

Kon, human makabasa niining magasina, ikaw dunay mga pangutana bahin sa Bibliya, palihog ayaw pagpanuko nga makigkita sa mga Saksi ni Jehova diha sa usa ka Kingdom Hall sa inyong dapit, o pagsulat ngadto sa mga magpapatik niining magasina. (Tan-awa ang panid 5.)

[Picture Credit Line sa panid 32]

Dover Publications, Inc.