Usa ka Hagit sa mga Ginikanan
Mius-os na ang moral sa kalibotan kon itandi kaniadto. Daghan kaayo ang paanunsiyo nga nalangkit sa sekso. Ang mga magasin nga nagapadayag sa mga babaye ingong ordinaryong mga dulaan ginabaligya diha sa mga groseriya. Gipasiugda sa usa ka awit nga rock ang usa ka babaye nga gilugos sa iyang gideyt nga kaila. Matuod, sumala sa makita ug madungog adlaw-adlaw, kini maoy usa ka kalibotan nga wala nay pamatasan!
ANG propesor sa mga pagtuon bahin sa pamilya nga si Greer Litton Fox miingon nga sa “40 o kapin pa” ka seksuwal nga mga buhat o ginapailang seksuwal nga relasyon “maladlad ang usa diha sa telebisyon gikan sa ala 1:30 ngadto sa alas 11 s.g. kada adlaw, ubos sa 5 porsiento nalangkit sa mga minyo.” Uban sa palumagian sa balita nga nagaduso sa sekso, dili ikahibulong nga mabasa usab ang “makalipong nga gidaghanon ug madaotong mga sangpotanan sa pagsabak sa mga tin-edyer.”
Siyempre, alang sa mga ginikanan nga nagatinguha sa labing maayo alang sa ilang mga anak, usa ka hagit ang pagmatuto kanila niining kalibotana nga wala nay pamatasan. Bisan pa, kini wala magkahulogan nga ang tanang mga batan-on nakigbahin sa seksuwal nga mga buhat. Ang mga surbi nagpakita nga katunga sa mga dalagitang 15-ngadto-sa-19-anyos sa Amerika nakaagi nag seksuwal nga relasyon, busa nagpakita nga adunay katunga nga wala pa makaagi! Dugang pa, ang kadaghanan niadtong nakasinati nag seksuwal nga relasyon nagmahay nga maayo pag sila wala makaagi niini. Ang usa misulat sa kolumnista sa mantalaan nga si Ann Landers:
“Ang pakigsekso kang Joe (akong unang naibgan) wala makaabot sa akong gidahom, busa gisulayan ko kini pag-usab uban kang Mike, unya kang Neal, unya kang George. Wala ako masayod kon unsay akong gipangita. Kon unsa man kadto, wala nako kini hipalgi. Daghan kaayong binuang nga mga ideya ang akong nakuha gikan sa mga magasin, gikan sa mga drama ug sa mga salida sa sine. Ang tinuod nga kinabuhi dili sama niana.
“Kon makahimo lang unta ako sa pagpakigsulti sa mga dalagita nga nagabasa sa imong tudling, sultihan ko sila nga ang pakigsekso nga tin-edyer pa dili makasulbad sa mga suliran, makadugang hinoon kini. Dili kini mopabati sa usa ka dalagita nga gihigugma, kini mopabati kaniyang masayon nga babaye. Akong sultihan sila nga kini dili mopahimo sa usa ka dalagita nga ‘labi pang babayen-on,’ kini mopahimo kaniya nga dili babayen-on.
“Kon maestorya ko lang ang mga ginikanan, awhagon ko sila nga ipasiugda ngadto sa ilang mga anak ang pagtahod-sa-kaugalingon ug ang hataas nga mga sukdanan.”
Sa pagkatinuod, ang mga batan-on nga suod sa ilang mga ginikanan ug mobating may kasegurohan sa ilang mga pamilya ug maayog pagbati sa ilang kaugalingon halayo nga mabiktima sa imoralidad kay sa niadtong dili suod sa ilang mga ginikanan. Ug adunay usa ka organisasyon nga kapin sa upat ka milyong mga tawo sa tibuok yuta diin ang mga batan-on ginatabangan sa paghawid sa usa ka sukdanan nga hataas kaayo kay sa kasagarang ginasunod karong adlawa.
Sa unsang paagi, sumala niining mga kamatuorana, nga imong matabangan ang imong mga anak sa pagpanalipod sa ilang kaugalingon gikan sa nagadugang nga imoralidad sa karon nga kalibotan? Sa unsang paagi matabangan mo sila nga magsubay sa mas malipayon, mas maayo, ug sa mas maayog moral nga mga kinabuhi? Mao kana ang ulohan sa sunod nga duha ka artikulo.