“Pagmata na, Kalibotan!”

PINAAGI niining makapapugwat nga ulohan sa panid-uno, ang Pagmata! nahimugso, sa Agosto 22, 1946. Ang iyang sirkulasyon niadtong panahona maoy ubos sa 500,000 kada isyu sa napulo ka mga pinulongan. Karong adlawa, kapin sa 13 milyones ang ginapatik sa 67 ka mga pinulongan. Apan nganong gipatik pa man kining magasina? Unsa kamaayo ang pagkadesinyo niini sa pagtabang kanimo, nga magbabasa, sa imong adlaw-adlaw nga pagkinabuhi?

Ang Pagmata! maoy puli sa Consolation nga magasin (1937) ug sa giunhan niini, ang The Golden Age (1919). Nganong ang Golden Age sa sinugdanan gihunahuna nga kinahanglanong kauban sa Watch Tower nga basahon 73 ka tuig kanhi?

Ang unang isyu sa The Golden Age, Oktubre 1, 1919, nag-ingon: “Ang kanasoran anaa sa kalisdanan sa politikal, sa pinansiyal, ug sa sosyal. Ang mga suliran kada adlaw nagasulbong, nga ang kasulbaran niana morag saylo sa gahom sa tawhanong katakos.” Laing tukma sa panahon nga komento mao: “Bisag asa ang bili sa pagkinabuhi nagausbaw ug nagausbaw ug daghan sa katawhan ang kinahanglan mosagubang sa tinuod nga kawalad-on ug kakulang sa pagkaon.” Tataw, dili ba kita nagaatubang sa samang mga suliran karong adlawa?

Ang mga magpapatik sa Pagmata!, samtang nagatagad sa mga suliran nga nagahampak sa kalibotan, nagatudlo sa bugtong tinuod ug dumalayong sulbad​—ang matarong nga pagmando ibabaw sa katawhan pinaagi sa kagamhanan sa Gingharian sa Diyos diha sa mga kamot sa nabanhawng Kristo Jesus. Pareho ang Hebreohanon ug ang Kristohanon Gregong Kasulatan nagtagna sa panahon sa dihang may “bag-ong mga langit ug usa ka bag-ong yuta,” nga mao, usa ka bag-o espirituwal nga pagmando ibabaw sa bag-o tawhanong sosyedad dinhi sa yuta. (Isaias 65:17; 2 Pedro 3:13; Pinadayag 21:​1-4) Samtang nagataho sa sekular nga mga hitabo ug mga natad sa kahibalo, ang Pagmata! nagpadayon sa pagtudlo nga maalamon sa sulbad sa Diyos alang sa tawhanong pag-antos. Sa regular nga paagi, kini nagatabang sa iyang mga magbabasa sa pagsagubang sa mga kabug-at sa adlaw-adlaw nga kinabuhi.

Apil sa ubang mga butang, ang Pagmata! nagadala ug kahupayan kanila nga naguol ug giabusaran niining satanasnong sistema diin kita nagkinabuhi. Kami sa kamatinud-anon makasulti, sama sa gisulti sa isyu sa 1946: “Nan, ania, ang usa ka magasin nga may hataas edukasyonal nga bili alang sa tanang ugdang ug matarong mga tawo sa tanang rasa, pagtuo ug nasyonalidad.” Kon buot nimo ug dugang impormasyon mahitungod niining magasina, palihog pakigkita sa mga Saksi ni Jehova sa Kingdom Hall nga duol kaninyo, o pagsulat sa magpapatik niining magasin. Tan-awa ang panid 5 alang sa impormasyon.