“Gisulat Alang Gayod Kanako”

MAO kana ang giingon sa usa ka batan-on gikan sa St. Lucia sa West Indies mahitungod sa librong Ang Imong Pagkabatan-on​—Pagpahimulos sa Labing Maayo Niini. “Sa dihang nakaabot ako sa kapitulo 5,” siya miingon, “nakita ko nga ang impormasyon gisulat alang gayod kanako. Kadto mahitungod sa masturbasyon ug homoseksuwalidad.

“Ang masturbasyon nahimong usa sa akong pangunang mga problema. Sa tulo ka tuig ako nakigbugno sa pagbuntog niini. Abi nakog ako lamang ang nagabuhat niana sa tibuok kalibotan. Salamat sa Diyos nga gipasulat kamo niining hamiling basahon nga mihatag kanakog tambag kon unsay akong buhaton. Gipadapat ko ang inyong mga solusyon.

“Ang akong ikaduhang problema maoy mahitungod sa mga trato. Nakaatubang ako ug daghang kasub-anan niining bahina. Ang ulahi kong trato dunay laing tratong babaye, ug daw nahigugma siya kaniya nga labaw kay kanako. Wala ko masayod kon unsay buhaton.

“Ang ikakomento ko, hinunoa, nga kon ako masakitan sa akong mga higala, ilabina sa akong trato, kuhaon ko lang kining gamay nga libro ug basahon kana. Dako kaayo kining tabang kanako. Kini nakahatag kanakog daghang tambag nga wala ko gayod mahunahuna. Human nabasa ang daghang kapitulo niining gamay pulang libro, ako napalingkod lamang ug mihilak. Ako sa pagkatinuod nahumpayan ug napahalipayan sa mga kapitulo 8 ug 23.”

Ang pagdako niining gubot nga mga panahon dili gayod masayon. Ang mga batan-on makaatubang ug daghang bag-ong mga situwasyon ug kinahanglang mohimog mabug-at nga mga desisyon. Motabako ba? Modawat ug mga droga? Unsang paggawi ang angay uban sa usa nga kaatbang sa sekso? Kon buot ka ug dugang impormasyon o usa ka libreng pagtuon sa Bibliya sa balay, palihog pagsulat sa Watch Tower, P.O. Box 2044, 1099 Manila, o sa nahiangay nga direksiyon nga gilista sa panid 5.