Ang mga Magtutudlo Gusto Niini

Usa ka 17-anyos nga estudyanteng babaye sa Netherlands misulat: “Ang akong amiga sa eskuylahan daghag pangutana mahitungod sa mga kalainan sa mga relihiyon. Gigamit ko ang kahigayonan sa paghatag kaniya sa librong Pagpangita sa Katawhan sa Diyos. Sa giasaynan ang among klase sa pagsulat ug komposisyon mahitungod sa usa ka ulohan nga among pilion, gipili sa akong amiga ang ulohang relihiyon aron magamit niya ang iyang bag-ong nabatonang libro.

“Sanglit kinahanglang ipakita namo ang tinubdan sa among impormasyon, ang libro nakaabot sa among magtutudlo. Sa ulahi nangutana siya kon diin naggikan ‘kanang tuman ka makaikag nga libro.’ Gisaysay sa akong amiga nga gikan kanako ang libro.

“Dihadiha gihangyo ako sa akong magtutudlo sa pagdalag upat ka kopya alang kaniya ug sa iyang mga higala. Sa sunod adlaw gitunol ko kaniya ang mga libro, ug dihadiha iyang gipakita sila ngadto sa ubang mga magtutudlo. Sa wala madugay, ako iyang giingnan: ‘Gitugotan ako sa administrasyon sa eskuylahan sa pagkuhag 35 niining mga libroha.’”

Daghan karong adlawa nagaila sa bili sa pagsusi sa relihiyon. Kadaghanang mga tawo nahibalo lamang sa relihiyon sa ilang mga ginikanan ug kasagaran hapawhapaw lamang. Apan kinahanglan ba nga ang imong relihiyon mao kanang imong namat-ag mahayag? Pinaagi sa pagtandi sa imong relihiyon sa iya sa uban, ikaw masangkapan pag maayo sa paghimog intelihenteng pagpili.

Kon gusto nimong dugang impormasyon o libreng pagtuon sa Bibliya sa balay, palihog pagsulat sa Watch Tower, P.O. Box 2044, 1099 Manila, o sa nahiangay nga adres nga nalista sa panid 5.