Tubag sa Usa ka Pag-ampo
USA ka babaye nga taga-Christchurch, New Zealand, misulti nga ang mga artikulo sa Pagmata! bahin sa “Pag-alim sa mga Samad sa Pag-abusar sa Bata” maoy tubag sa iyang pag-ampo. Siya misaysay:
‘Niadtong Agosto 1991 ubay-ubay kanamo nakabaton sa makalilisang nga kasinatian sa pagkakita sa usa ka higala nga mibatig kasakitan sa paghinumdom sa pag-abusar. Gibati ko ang kasubo ug kaguol sulod sa mga tulo ka adlaw, apan kami miampo sa tim-os kang Jehova alang sa usa ka magasin nga maghisgot sa ulohan. Gikinahanglan namo ang tabang. Nagpaabot lang kamig lima ka semana. Sa ngalan sa daghan, daghang biktima salamat kaninyo tungod sa maalamon, sensitibong mga artikulo sa Oktubre 8, 1991, Pagmata!’
Ang anaa sa itaas maoy usa lang sa ginatos ka sulat sa apresasyon alang sa Pagmata! mahitungod sa pag-abusar sa bata. Sa laing sulat nga nadawat sayosayo ning tuiga, ang nagsulat miingon nga kadaghan siya mosulay sa pagtapos sa pagbasa sa mga artikulo tungod kay siya dili makahunong sa paghilak. Siya miingon:
“Bisan karon, matandog kaayo ako samtang mosulay ako sa pagpahayag sa akong apresasyon alang sa panahon ug kusog nga gigugol sa pagtabang kanamo nga nagbaton sa mga pagbati sa kaulawan ug sala human lugosa sa seksuwal ug sa emosyonal nga paagi sa usa nga nag-angkong ‘nahigugma’ kanamo sa dihang kami bata pa kaayo ug mahuyang. Wala akoy ideya nga daghan kaayo ang may kasinatian nga sama sa ako. Ako sa gihapon maglisod kaayo sa pagbuntog sa mga pagbati, apan ang mga sugyot diha sa panid 10 ug 11 makatabang kaayo. Daghan pa kaayo akog isulti, apan kinahanglan lang isulti nga ang akong mga pag-ampo moadto kang Jehova alang kaninyo tungod sa pagsalig kang Jehova sa paghatag kaninyo ug kaisog sa pagsulat mahitungod nianang tandogonong ulohan.”
Lain pa gayod miingon: “Kini usa sa labing maayong mga obra maestra nga sukad inyong napatik bahin sa tawhanong mga relasyon. Kini nagyagyag niining satanasnong buhat ug sa mga naghimo niini, nagtin-aw ngadto sa mga dili biktima sa hapdos nga kadaotan; ang iyang mga biktima gihupay ug giedukar. Ang pultahan sa pagdahom ug kaluoy ug pagpaluyo gikan sa katawhan sa Diyos sa bug-os nabuksan.”
Ang mga Saksi ni Jehova maoy usa ka internasyonal nga organisasyon sa kapin ug upat ka milyong estudyante sa Bibliya nga debotado sa pagtabang sa katawhan sa ilang mga suliran ug sa pagtabang kanila nga makakat-on ug dugang mahitungod sa mga katuyoan sa Diyos. Kon buot ninyong makabaton ug dugang impormasyon o libreng pagtuon sa Bibliya sa balay, palihog pagsulat ngadto sa Watch Tower, P.O. Box 2044, 1099 Manila, o sa angay nga direksiyon nga nalista sa panid 5.