Usa Ka ba ka Mahigugmaong Ginikanan?
GIHIGUGMA mo ba ang imong mga anak? Mapasigarbohon ka ba kanila? Gibati mo ba nga ang matag usa maoy linain, talagsaon, di-kapulihang indibiduwal? Mao kanay gibati sa kadaghanang mga ginikanan. Apan sultihan mo ba ang imong mga anak nga mao kanay imong gibati? Ginadayeg mo ba sila ilabina kon sila may maayo nga nahimo? Ug ginapakita mo ba ang pagmahal sa ubang mga paagi—uban sa malumo nga pakigdula, mapasaligong paghapohap, mahigugmaong mga halog?
“Apan dili kana ang akong paagi,” tingali motutol ang uban. “Dili ako ingon niana ka bukas sa akong mga pagbati.” Tinuod, dili ang tanan mapasundayagon ug kinaiya. Bisan pa, ang pagpakitag pagmahal sa imong mga anak tingalig mas hinungdanon kay sa imong naamgohan sukad.
Usa ka grupo sa mga siyentipiko nagsunod sa usa ka pagtuon niadtong 1951 sa 400 ka bata sa kindergarten. Tali sa 94 ka lalaki ug babaye nga ilang nasubay, sila nakadiskobre ug dayag nga mga sumbanan. Sumala sa The New York Times, kadtong mga bata nga may mahigugmaon, mapinanggaon nga mga ginikanan mopatim-aw nga maayog lakat diha sa ilang hamtong nga kinabuhi. Sila sa lintunganay may malamposong mga kaminyoon, nakapadako ug mga anak, nalipay sa ilang trabaho, ug may suod nga mga panaghigalaay. Si Dr. Carol Franz, nga maoy nangulo sa pagtuon, miingon sa mantalaan nga sila “nagpakitag mahimsog nga panghunahuna, may pagbati sa kalagsik ug katagbawan sa ilang kaugalingon ug sa ilang mga kinabuhi.”
Sa pagtandi, nakaplagan ni Franz nga “kadtong may mabugnaw, walay pagtagad nga ginikanan naglisod kaayo sa ilang ulahi nga kinabuhi sa tanang paagi—sa trabaho, sa pagpakig-angay sa katilingban, ug sa kahimsog sa panghunahuna.” Ngani, ang pagtuon nagsugyot nga ang kakulang sa pagmahal sa mga ginikanan hayan labi pang makadaot sa mga anak sa ulahi kay sa diborsiyo sa mga ginikanan, alkoholismo, o kakabos.
Kini dili angay ikahibulong sa sinserong mga estudyante sa Bibliya. Sila nahibalo pag-ayo kon giunsa pagtagad ni Jesus ang mga bata. Iyang gipabilhan sila, nagpasuod kanila ngadto kaniya, ug nagpakita sa iyang pagbati ngadto kanila. (Marcos 10:13-16; Lucas 9:46-48; 18:15-17) Siyempre, gisundog lamang niya ang iyang langitnong Amahan niining bahina—ang Usa nga nahimong Amahan ngadto sa mga ilo. (Salmo 68:5) Si Jehova maoy usa ka hingpit nga Ginikanan; makalilipay alang niadtong nahigugma kaniya, siya makatagana sa bisan unsang kakulangan sa tawhanong mga ginikanan.—2 Corinto 6:18.