Misteryosong mga Kahayag—Diin Gikan?

ANG amihananon ug habagatnong mga kahayag, o auroras, nahimong tinubdan sa kahibulong sa mga tawo nga nagpuyo duol sa hiyomagnetikong mga polo norte ug sur. Gituohan karon nga sa kahiladman sa yuta, ang mga kolumna sa natunawng mga metal mopataas ug mahulog ug mabawog inigtuyok sa yuta. Magpahinabo kini ug elektrikal nga mga sulog nga mopatunghag mga magnetikong natad nga nahan-ay sa tuyokanan sa nagtuyok nga yuta. Ang mga partikulo sa radyasyon nga mahidangat sa yuta gikan sa adlaw mopahinabog dayag nga epekto tungod niining magnetikong mga natad. Apan ang epekto mapausbaw inig-abot sa midaghang mga partikulo gikan sa dako kaayong mga siga sa adlaw nga nalangkit sa sunspots. Daghang mga partikulo masikop sa magnetikong natad sa yuta. Ang mga atomo diha sa atong atmospera diha sa mga sona nga naglibot niining magnetikong mga polo malagsik ug mopatunghag dayag nga kahayag nga may lainlaing mga kolor. Ang mga kolor mapatungha sa dihang ang mga atomo sa oksihena ug nitrohena malagsik tungod sa maong enerhiya gikan sa adlaw ug mopatunghag dayag nga kahayag diha sa mga gitas-on sa balod nga pula/berde/biyoleta. Kasagarang aurora berde ug kolor, nga ang ubang mga bahin maoy pula ug biyoleta. Sa amihanang mga bahin sa yuta, kining mga kahayaga gitawag aurora borealis (Latin, banagbanag sa amihan), samtang sa habagatan, sila gitawag aurora australis (banagbanag sa habagatan).

“Ang mga langit nagapahayag sa himaya sa Diyos,” matud sa karaang salmista. (Salmo 19:1) Kon buot nimong mahibalo ug dugang mahitungod sa Maglalalang sa mga langit, palihog ayaw pagpanuko sa pagpakigkontak sa mga Saksi ni Jehova diha sa inyong dapit, o sa pagsulat sa mga magpapatik niining magasina.​—Tan-awa ang panid 5.

[Picture Credit Line sa panid 32]

Letrato sa NASA