Relihiyosong Kamatinugoton—500 ka Tuig sa Ulahi!
LIMA KA GATOS ka tuig sa miagi, si Christopher Columbus milayag gikan sa Espanya. Usa ka adlaw lamang una pa sa paglarga ni Columbus, laing panon sa mga sakayan mibiya sa Espanya, padulong sa laing direksiyon. Si Columbus ug ang iyang mga tawo mibalik nga madaogon, kay nakadiskobre ug bag-ong kayutaan. Apan ang laing makaluluoyng mga biyahedor wala na gayod makakita pag-usab sa ilang yutang-natawhan.
Kinsa kadtong mga tawhana, ug nganong sila gihinginlan gikan sa ilang yuta? Sila mga Hudiyong Espanyol. Duha ka semana una pa si Columbus nakadawat ug harianong pagpaluyo alang sa iyang biyahe sa pagpangdiskobre, si Fernando ug Isabella, ang Katolikong mga magmamando sa Espanya, mipagula ug sugo nga palagpoton ang tanang Hudiyo sa Espanya, “nga dili na gayod pabalikon.” Ilang gipasanginlan ang Espanyol nga mga Hudiyo nga milapas sa balaang Katolikong pagtuo.
Kining sugoa, kauban sa bag-o lang natukod nga Inkwisisyon, nagtimaan sa sinugdanan sa krusada aron himoon ang Espanya nga lonlon Katoliko. Usa ka dekada tapos palagpota ang mga Hudiyo, si bisan kinsang Moro nga magatuman sa Islamikong pagtuo hinginlan usab. Ug ang Inkwisisyon daklit rang mipuo sa nagsugod pang mga pundok sa Protestante. Si Columbus, nga mipalanog sa kadili-matinugotong espiritu sa iyang harianong mga tigpaluyo, miingon nga dili pasudlon ang mga Hudiyo sa tanang yuta nga iyang madiskobrehan.
Ang espiritu sa relihiyosong kadili-matinugoton sa Espanya nagpabilin, hangtod niining sigloha. Ubos sa diktadora ni Francisco Franco, ang Katolikong relihiyon lamang ang mipahimulos sa “opisyal nga panalipod.” Ang daghang buot motuman sa laing pagtuo giaresto nga dili makataronganon. Ang mga Saksi ni Jehova sa Espanya gibilanggo sa sumbong nga milapas sa espirituwal nga paghiusa sa Espanya. Niadtong 1959 ang ministro sa kagamhanan nga si Camilo Alonso Vega misugo sa kapolisan nga ipadayon ang “pagbungkag sa bug-os” sa mga kalihokan sa mga Saksi. Apan ikalipay, ang mga panahon nausab.
Sa Marso 31, 1992, sa tukma lima ka gatos ka tuig tapos pirmahi sa iyang mga gisundan ang sugo sa pagpalagpot sa mga Hudiyo, si Juan Carlos, ang presenteng hari sa Espanya, miduaw sa sinagoga sa Madrid ingong usa ka simbolikong panag-uyon sa Korona sa Espanya uban sa mga kaliwat niadtong gihinginlang Espanyol nga mga Hudiyo.
“Gipakli namo ang panid sa kadili-matinugoton sa Espanya,” pahayag sa ministro sa hustisya sa Espanya, si Tomás de la Quadra-Salcedo. Karon ang mga Hudiyo, mga Muslim, ug mga Protestante makasimba na nga walay babag. Ug ang mga Saksi ni Jehova dili na ubos sa pagdili. Ang Madrid nagapasigarbo sa usa ka bag-ong mosque ug usa ka sinagoga, ingon man sa sangang opisina sa mga Saksi ni Jehova sa Espanya. Kay may kapin sa 90,000 ka aktibong mga membro, ang mga Saksi giisip nga maoy kinadak-ang dili-Katoliko nga relihiyon sa Espanya.
Kon gusto ka ug dugang impormasyon mahitungod sa mga Saksi ni Jehova ug sa ilang mga tinuohan, palihog pagsulat sa Watch Tower, P.O. Box 2044, 1099 Manila, o sa tukmang direksiyon nga nalista diha sa panid 5.
[Hulagway sa panid 32]
Sangang-buhatan sa Watch Tower Society sa Espanya