Usa ka Nag-inusarang Kinabuhi

“SIYA natawo sa gamay nga balangay, ang anak sa banwahanon nga babaye. Nagdako siya sa lain pang balangay, diin siya nagtrabaho sa pandayan hangtod siya nagtrayenta anyos. Dayon sa tulo ka tuig nahimo siyang magpapanaw nga magwawali.

“Siya wala gayod makasulat ug usa ka basahon. Siya wala gayoy katungdanan. Wala gayod siya makabaton ug pamilya o nakapanag-iyag balay. Siya wala makaeskuyla sa kolehiyo. Wala gayod siya makaduaw ug dako nga siyudad. Wala gayod siya makabiyahe ug duha ka gatos ka milya gikan sa lugar nga iyang natawhan. Wala gayod siyay gihimong mga butang nga sagad ilangkit sa usa uban sa pagkabantogan. Siya walay kredensiyal gawas sa iyang kaugalingon.

“Trayentay-tres anyos pa lamang siya dihang ang bul-og sa hunahuna sa publiko mibali batok kaniya. Mikalagiw ang iyang mga higala. Gitugyan siya ngadto sa iyang mga kaaway ug nag-antos sa pagbiaybiay sa usa ka pagsulay. Siya gilansang sa [estaka] tunga sa duha ka kawatan. Samtang siya himalatyon, giripahan sa mga tigpatay ang iyang bisti, ang bugtong kabtangan nga iyang nabatonan sa yuta. Dihang siya namatay, gilubong siya sa hinulamang lubnganan tungod sa kaluoy sa usa ka higala.

“Milabay ang napulog-siyam ka siglo, ug karon siya nagpabiling ang pangunang persona sa tawhanong kasaysayan, ug ang pangulo sa kauswagan sa katawhan. Sa tanang kasundalohan nga nakamartsa sukad, sa tanang mga sakayang iggugubat nga milawig sukad, sa tanang mga parlamento nga nakalingkod sukad, sa tanang mga hari nga nakamando sukad, kon tingbon, wala makaapektar sa kinabuhi sa tawo niining yutaa nga ingon nianang usa ka nag-inusarang kinabuhi.a”​—Wala hiilhing komentaryo sa kinabuhi ni Jesu-Kristo.

[Footnote]