‘Wala pa gayod ako makahibalag ug usa ka Saksi ni Jehova nga wala nako maangayi’
NAKAHIBALAG ka ba sukad ug usa ka Saksi ni Jehova nawong ug nawong? Nakahigayon ka ba sa pagsusi kon unsa gayod ang ilang gituohan? Lagmit nakahibalag ka sa daklit ug usa ka Saksi sa kalye o sa inyong ganghaan. Apan kadaghanan dili kana motugot ug panahon alang sa tinuod nga pakigkomunikar.
Si George Plagenz, usa ka kolumnista sa relihiyon sa T.B., misulat mahitungod sa iyang mga kasinatian uban sa mga Saksi: “Sa pagkutlo kang Will Rogers [Amerikanong komedyante], kinsa miingon nga wala pa siya makahibalag ug tawong wala niya maangayi, ako wala makahibalag sukad ug Saksi ni Jehova nga wala nako maangayi.”
Dayon gikutlo ni Plagenz ang Irlandes nga awtor nga si Alan Bestic: “Ang mga sakop niining tinamay kaayong organisasyon tighugoyhugoy, masadyaon ug malipayong katawhan. Sa ilang internasyonal nga asembliya sa London [Inglaterra], ako gitagad uban sa bug-os nga kalulot, malumong kortesiya ug tiunay nga pagkamahigalaon sa matag Saksi nga akong nahibalag.”
Si Plagenz miingon nga ang kanhing agresibong mga paagi sa pagbalay-balay sa pila ka Saksi nakamugnag daghang pagsupak. “Apan kadaghanan niana nausab na.” Dayon gikutlo niya ang usa ka Saksing tigpamaba: “Kadaghanan sa mga Saksi karong adlawa kanhi naglamba ug pultahan sa nawong sa usa ka Saksing miduaw.” Nganong adunay mas positibong sanong karong adlawa? “Ang katawhan nagsugod pagkaamgo . . . nga walay tawhanong kasulbaran ang dagko kaayong mga suliran nga giatubang sa kalibotan.”
Ang mga Saksi ni Jehova nagtuo nga ang bugtong kompletong sulbad sa mga suliran sa katawhan gipaila diha sa pag-ampo ni Jesus: “Amahan namo sa mga langit, balaana ang imong ngalan. Umanhi ang imong gingharian. Matuman unta ang imong kabubut-on, ingon sa langit, dinhi usab sa yuta.” (Mateo 6:9, 10) Ang pagmando pinaagi sa Gingharian sa Diyos, nga giila sa usa ka masinugtanon ug maaghop tawhanong banay, mao ang bugtong kasulbaran sa kabangis ug pagdumot nga nagsakit karon sa kalibotan. Kon buot kang masayod ug dugang bahin sa Bibliya ug sa mga pagtulon-an niini, palihog pagpakigkita sa mga Saksi ni Jehova sa haduol nga Kingdom Hall, o pagsulat sa kinadul-ang direksiyon nga gipaila sa panid 5.