Tanlag, Nganong Gihasol Mo Ako?
“OH MAHADLOKONG tanlag, gisakit mo gayod ako!” Ang maong bantogang mga pulong, nga gipamulong ni Haring Richard III sa dula ni Shakespeare nga may samang titulo, nagbatbat sa pagbasol nga ipahinabo sa tawhanong tanlag. Sa tinuod nga kinabuhi ang tanlag nagsamok ug nag-usab sa mga kinabuhi sa daghan.
Ang gahom sa tanlag giilustrar sa kaso sa usa ka batan-ong Italyano. Ang iyang trabaho ingong guwardiya naglangkit sa pagdalag dagkong kantidad sa kuwarta. Maayo ang tanan hangtod nga, usa ka adlaw, siya natintal ug nangawat ug usa ka sakong nasudlan ug 300,000,000 lira [$185,000]. Sanglit may duha siya ka kauban sa trabaho ug lisod nga mahibaloan kon kinsa kanila ang nangawat, silang tulo gipapahawa.
Iyang gitagoan ang kinawat nga kuwarta, nga nagplanong gamiton kana iniglinawlinaw na sa kahimtang. Hinuon, ang wala damhang paghasol misugod: Siya kanunayng naghunahuna mahitungod sa pagpapahawa sa iyang inosenteng mga kauban. Ang iyang tanlag dili mohatag kaniyag usa ka gutlong kalinaw. Dili siya makatulog. Dili siya makakaon. Lisod na siyang pakiglabotan.
Sa kataposan, nabug-atan sa pagkasad-an ug naluya sa iyang sulodnong pakigbisog, miadto siya sa polis ug giuli ang kinawat nga kuwarta. Siya miingon kanila: “Ang paghasol maoy grabe kaayo. Dili na ako makaantos pag dugay!” Siya midugang: “Maayo pang mabilanggo nga nahibalong ako matinud-anon kay sa may kagawasan apan uban sa tanlag nga nagahasol kanimo ingon nga kawatan.”
Ang tanlag maoy gasa sa Diyos sa tanang tawo. Kana mahimong mopasangil o mopasaylo kanato. Kon kita mamati niana, kana mahimong magpalingkawas kanato sa pagbuhat ug kasaypanan, nga pakamatarongon ang seryosong kadaotan. Busa inay nga isalikway ang mga awhag niana o maligutgotong mobagulbol batok niana sama sa gihimo ni Haring Richard III ni Shakespeare, angay natong mahalon ug panalipdan ang atong tanlag.—Roma 2:14, 15.
Kon buot kag dugang impormasyon mahitungod sa Bibliya ug sa praktikal nga tambag niini, palihog pakigkita sa mga Saksi ni Jehova diha sa inyong lokal nga Kingdom Hall, o pagsulat sa labing duol nga direksiyon nga nalista diha sa panid 5.