Himoang Malipayon ang Imong Pamilyahanong Kinabuhi

SA DIHANG gipadalhan sa usa ka pasyente sa South Carolina, T.B.A., ang usa ka nars nga nag-atiman kaniya ug tract nga Magkalipay sa Kinabuhing Pamilyahanon, ang nars mitawag kaniya sa telepono aron pasalamatan siya. Matud sa nars nga iyang gipaambit ang tract sa iyang bana ug dungang gibasa nila kana nga mapabilhon. Sa pagkatinuod, ang nars nag-ingon nga dili sila makatuo nga dunay mabatonang basahon nga positibo kaayo sa pagtabang sa mga pamilya.

Ang pasyente mipahayag: “Giingnan ako sa nars nga mao gayod kadtong impormasyona ang gihisgotan nila sa iyang bana bahin sa tilinguhaon ug positibong mga butang diha sa pamilya apan wala sila gayoy ideya nga mabatonan ang maong ulohan diha sa pinatik nga porma. Iyang gitapos ang tawag sa telepono pinaagi sa pag-ingon nga iyang gidaladala ang gamayng tract bisan asa siya moadto ug gibalikbalik kana ug basa. Siya miingon nga kon ako adunay ubang impormasyon bahin sa pamilyahanong kinabuhi nga kon mahimo pakit-on siya niini.”

Gipadad-an sa pasyente ang nars ug librong Paghimo sa Imong Pamilyahanong Kinabuhi nga Malipayon ug mihimog mga kahikayan sa pagpakigkita sa nars aron hisgotan kini uban kaniya. Tingali ikaw usab moapresyar sa impormasyon nga makatabang kanimo sa paghimo sa imong pamilyahanong kinabuhi nga mas malipayon. Kon gusto nimong makadawat ug kopya sa Magkalipay sa Kinabuhing Pamilyahanon ug sa Paghimo sa Imong Pamilyahanong Kinabuhi nga Malipayon o magtuon sa Bibliya sa balay nga walay bayad, palihog pagsulat sa Watch Tower, P.O. Box 2044, 1099 Manila, o sa nahiangayng direksiyon nga nalista sa panid 5.