“Pagwagtang sa Kagahapon”

“Kita nahibalo nga ang tanang kalalangan padayong nagaagulo nga tingob ug tingob nga anaa sa kasakit hangtod karon.” Kana tinuod sa dihang gisulat kining mga pulonga halos 2,000 ka tuig na ang milabay, ug kini tinuod karong adlawa. Apan ang kasaysayan, uban sa tanan niining tawhanong pag-antos, mawagtang kaha?—Roma 8:22.

ANG 32-panid punog-kolor nga brosyur nga nag-ulohang Tinuod Bang May Pagtagad ang Diyos Kanato? naghisgot gayod niining butanga. “Ang Diyos magabalos kanato tungod sa pag-antos nga tingali atong giantos niining kalibotana,” kini nag-ingon. “Uban sa dakong kaluoy ang Diyos labaw pang magabalos sa daotang kagahapon nga atong naagoman.”

Gihugpong sa publikasyon ang makapakombinsir nga ebidensiya nga usa ka masanag nga kaugmaon ang nagpaabot kanato. Human basaha kini nga brosyur, usa ka 20-anyos nga taga-Canada misulat: “Natandog kaayo ang akong kasingkasing niining publikasyona nga dili nako ikahubit sa mga pulong! Kini maoy usa gayod ka bililhong mutya. Kini magpahinumdom kanato sa kahibulongang paglaom nga giandam sa Diyos alang kanato. Gibati ko nga ang seksiyong ‘Pagwagtang sa Kagahapon’ mahigugmaong gisulat. Salamat sa pagpahinumdom kanamo kon unsa ka dako ang paghigugma ni Jehova kanato.”

Kon buot kag usa ka kopya niini nga brosyur o buot nga adunay usa nga moduaw kanimo sa imong balay aron hisgotan kining butanga, palihog pagsulat sa Watch Tower, P.O. Box 2044, 1099 Manila, o sa nahiangay nga adres nga nalista sa panid 5.