“Malisod Kaayo nga Magdako nga Wala Siya”

“AKO nagsulat human nako mabasa ang atong kinaulahiang gula sa kombensiyon, Sa Dihang ang Imong Minahal Mamatay, aron sa pagpahayag sa akong halalom ug kinasingkasing nga pagpasalamat alang sa maong mabinationg pagkasulat ug makapalig-on-sa-pagtuo nga brosyur.

“Ako 18 anyos. Ang akong amahan namatay sa aksidente sa sakyanan sa dihang ako otso anyos, ug bisan tuod kini maoy napulo na ka tuig kanhi, mobati gihapon ako sa akong kahiladman ug hilabihang kamingaw. Malisod kaayo nga magdako nga wala siya. Daghan kaayong butang nga buot nakong isulti kaniya, ipakig-ambit kaniya, sayron bahin kaniya. Pagkamakapahupay gayod nga mapahinumdoman sa kang Jehova nga mahigugmaong paglaom sa pagkabanhaw! Nakapalugmaw kini sa akong mga luha. Sa makausa pa, salamat nga inyong gipalig-on pag-usab ang akong paglaom.”​—Usa ka batan-ong Saksi sa Austria.

Daghang sulat nga sama niini ang nadawat sa mga buhatan sa Watchtower Society sa New York. Karon gipatik na sa 18 ka pinulongan, ang 32-panid nga brosyur nagapakig-ambit ug kahupayan sa minilyong tawo. Kon ikaw nagbangotan gumikan sa kamatayon sa usa ka minahal, ayaw pag-ukon-ukon sa paghangyo ug usa ka kopya niining maong publikasyon pinaagi sa pagsulat sa Watch Tower, P.O. Box 2044, 1099 Manila, o sa nahiangay nga direksiyon sa panid 5.