Pag-ugmad ug Katilingban nga Maayog Panglawas
ANG luyoluyong editor sa magasing New African misulat di pa dugay: “Adto sa bisan unsang Aprikanhong nasod karong adlawa ug makakita ka ug diyutayng adunahan nga nagkinabuhing maluho samtang ang masa nag-antos sa hilabihang kakabos. . . . Unsaon nato paglingkawas niining laang sa kakabos? Ang yanong solusyon mao: kuhaa ang mga adunahan ug ipaambit ang bahandi. Sa aktuwal nga kahimtang dili kini mosaler. Una sa tanan, walay igong bahandi alang sa tanan. Ikaduha, kon kuhaon ang mga adunahan sila ilisan dayon sa lain. Ikatulo, ang mga pag-eksperimento sa sosyalistang mga mithi [milampos] lamang sa pagpaangay sa kakabos.
“Adunay usa lamang ka solusyon sa kaugmaran nga milampos sa tanang nasod sa tanang panuigon: ang pag-ugmad sa indibiduwal. Ang mga tawo maoy nagpatunghag katilingban. Ang maayong-pagkaedukar, maayog-panglawas, positibo ug mamugnaong mga tawo dili-kalikayang mopatungha ug maayog-panglawas, lagsik nga mga katilingban.”
Kon ang luyoluyong editor nangita pa ug pananglitan, makaplagan unta niya kana diha sa mga Saksi ni Jehova. Sa Aprika, sa pagkatinuod sa tibuok kalibotan, ang mga Saksi naningkamot sa pagtabang sa mga tawo nga mahimong edukado, maayog-panglawas nga mga membro sa tibuok-yutang katilingban. Lakip sa ubang mga butang, gitudloan nila ang mga hamtong nga dili makamaong mobasa ug mosulat nga makabasa ug makasulat. Pinaagi sa ilang mga publikasyon, sila nagtanyag ug mga instruksiyon sa panghinlo, pag-atiman sa panglawas, ug mga relasyon sa pamilya. Sa ilang mga tigom maingon man sa tinagsatagsa, ang mga Saksi nagdinasigay sa usag usa sa pagsunod sa tambag sa Bibliya nga magmatinud-anon, magkugi, ug magmabungahon.
Ang resulta mao ang lig-on, lagsik nga katilingban nga nalangkoban sa halos lima ka milyong tawo sa tibuok kalibotan. Apan ang mga Saksi dili modawat sa pasidungog niini. Ilang gipahinungod ang ilang espirituwal nga kauswagan ngadto sa buhing Diyos, kinsa nag-ingon: “Ako, si Jehova, mao ang imong Diyos, ang Usa nga nagtudlo kanimo sa pagpahimulos sa imong kaugalingon, ang Usa nga nagpahinabo kanimo sa paglakaw sa dalan nga angay nimong pagalaktan.”—Isaias 48:17.
Kon buot nimo ug dugang impormasyon bahin sa Bibliya ug sa praktikal nga tambag niini, palihog kontaka ang mga Saksi ni Jehova sa imong lokal nga Kingdom Hall, o pagsulat sa kinadul-ang adres nga nalista sa panid 5.