“Usa ka Pulong sa Pagpasalamat”

Mao kana ang buot ipahayag sa usa ka batan-ong estudyante sa Hapon. Siya nagbatbat nga nakadawat siyag linain nga mga premyo sa eskuylahan tungod sa mugbong mga sinulat nga gipasukad niya gikan sa mga artikulo nga iyang nabasa sa Pagmata!

“Sa wala pa mosulat niadtong mugbong mga sinulat,” siya midugang, “ginatipigan ko ang mga magasin diha sa akong balay nga wala magtipig ug impormasyon diha sa akong ulo. Sa dihang akong napalandong ang kamapuslanon sa mga magasin alang kanako, ako miingon sa akong kaugalingon, ‘Kini ang mga magasin nga wala nako basaha.’ Gisanapan ako sa mga pagbati sa pagmahay. Sukad niadto, ginabasa ko na ang mga magasin nga maoy angay kong himoon.”

Agig pagpabili, kini nga estudyante dugang nga misulat: “Ang mga magasin mapuslanon kaayo sa pagtabang kanako sa pagdumala sa tanang nagkalainlaing mga pagsulay nga akong maatubang sa eskuylahan. Salamat sa pagtagana kanunay niining maong maayong mga artikulo. Ako padayong magpaabot sa pagdawat niini.”

Ang Pagmata! regular nga nagapatik ug mga artikulo nga makatabang sa mga batan-on sa pagsagubang sa mga problema nga maatubang nila sa balay ug sa ekuylahan. Kon buot nimo ang usa ka kopya sa Pagmata! o buot nga adunay moduaw kanimo sa imong balay aron tabangan ka nga makakaplag sa pinasukad-sa-Bibliya nga mga tubag sa mga problema nga lagmit imong nabatonan, palihog pagsulat sa Watch Tower, P. O. Box 2044, 1099 Manila, o sa nahiangay nga adres nga nalista sa panid 5.