Kahupayan Alang sa Pamilya ug mga Higala

SA DIHANG ang TWA flight 800 nakras sa Dagat Atlantiko sa miaging Hulyo 17, ang tanang sakay nga 230 ka tawo namatay. Naglakip kini sa 16 ka Pranses nga mga estudyante sa hayskul ug lima ka hamtong nga tsaperon gikan sa Montoursville, usa ka gamayng lungsod sa Pennsylvania nga may populasyon nga 5,000. Sa serbisyo sa paghandom sa nangamatay sa lungsod niadtong Agosto 17, usa sa mga mamumulong, si Rudolph Giuliani, mayor sa New York City, miingon nga kon ang samang porsentahe sa populasyon sa New York City ang namatay, 35,000 ka kinabuhi ang lagmit nahanaw!

Ang prinsipal sa hayskul, si Dan Chandler, gihangyo nga mopakigpulong sa paglubong sa pipila ka estudyante. Gikutlo niya ang saad sa Bibliya sa Pinadayag 21:4, nga nag-ingon nga sa bag-ong sistema sa Diyos “wala na unyay kamatayon, ni pagbangutan ni pagtiyabaw ni may kasakit pa.” Ug kon nganong nahitabo ang maong mga katalagman, iyang gipunting ang Ecclesiastes 9:11, nga naghisgot sa “panahon ug wala damhang panghitabo” nga modangat kanatong tanan. Daghan ang nahibulong sa pagkadungog sa ilang prinsipal sa hayskul nga nagtanyag sa maong makapahupay nga mga komento.

Aron makataganag dugang tabang, gipahiluna ni Chandler ang usa ka lamesa sa tunghaan aron mabatonan ang mga publikasyon sama sa 32-panid nga brosyur nga Sa Dihang ang Imong Minahal Mamatay ug ang tract nga Unsay Paglaom Alang sa Namatay nga mga Minahal? Ginatos ka kopya sa literatura sa Bibliya ang gidawat, ug daghan ang nagpahayag ug pasalamat sa paghupay nga gitagana niini.

Ikaw usab mahimong makakaplag sa gikinahanglang paghupay gikan sa gihisgotan-sa-ibabaw nga brosyur ug tract. Kon buot kang makadawat ug kopya sa matag usa o buot ug libreng pagtuon sa Bibliya sa balay, palihog pagsulat sa Watch Tower, P.O. Box 2044, 1060 Manila, o sa tukmang adres nga gilista sa panid 5.

[Picture Credit Line sa panid 32]

Kortesiya sa Williamsport Sun-Gazette

[Picture Credit Line sa panid 32]

Corey Sipkin/Sipa Press