Usa ka Bililhong Magasin

USA ka babayeng nars nga taga-London misulat sa mosunod nga mga komento ngadto sa mga magpapatik sa Pagmata!:

“Usa ka adlaw ako nakigsulti sa bag-o nakong silingan, si Jackie, bahin sa akong trabaho uban sa mga tigulang. ‘Duna koy pipila ka magasin nga basin gusto nilang basahon,’ giingnan ko niya. Gidala ko ang iyang mga magasin ngadto sa trabahoan ug gibutang sila sa mga lamesang pangkape. Sa mga pagduaw sa ulahi akong namatikdang ang mga magasin pinakli na pag-ayo, mao nga gibasa kana sa mga tawo.

“Sa ulahi mibalhin ako ug trabaho ug misugod pagtrabaho sa usa ka ospital. Akong gibutang ang pipila sa mga magasin sa akong silingan diha sa lawak-hulatanan. Sa makausa pa akong nakita nga sila gibasa. Usa ka buntag sa dihang ako nag-atiman sa kamot sa usa ka tigulang nga babaye, ang iyang bana miingon: ‘Maayo untag itugot ra, apan akong gikuha kining magasina gikan sa inyong lawak-hulatanan. Duna kiniy usa ka maayo kaayong artikulo nga buot nakong ipaambit sa akong anak lalaki.’

“Ang mga magasin nahimong usa ka panalangin usab kanako. Sanglit ako nagdawat pag pagbansay sa narsing, akong gigamit ang impormasyon diha niining mga artikuloha sa akong mga sinulat sa panukiduki, nga may maayong sanong gikan sa akong mga magtutudlo.

“Ang akong silingan nga si Jackie maoy usa sa mga Saksi ni Jehova, ug ang magasing akong gitumong mao ang Pagmata! Ang akong nabasa niining magasina nakatabang nako sa pagsabot ug dako bahin sa akong kaugalingon ug bahin sa umaabot sa katawhan.”

Kon buot nimong makadawat ug umaabot nga mga isyu sa Pagmata!, palihog pagkontak sa mga Saksi ni Jehova sa inyong dapit o pagsulat ngadto sa kinadul-ang adres nga natala sa panid 5.