Kini Nagpalihok Kaniya!
Usa ka tawo nga taga-Caracas, ang kabisera sa Venezuela, miduaw sa iyang edaran nga amahan, si Rufino. Ang amahan nagpuyo sa La Loma, usa ka hilit nga balangay sa banika. Ang anak nagdala kang Rufino sa librong Ikaw Mabuhing Walay Kataposan sa Paraiso sa Yuta.
Sa ulahi, ang mga Saksi ni Jehova nga taga-Los Humocaros miadto sa La Loma aron magsangyaw. Sa ilang kahibulong, ang mga tawo nagsigeg ingon nga may Saksi nang miduaw kanila. Ang mga Saksi natingala tungod kay nasayod sila nga walay Saksi nga nagpuyo sa maong dapit. Unya may usa ka tawo nga mitudlo sa balay sa gituohang Saksi—kadto mao ang balay ni Rufino!
Si Rufino nalipay nga mahimamat ang iyang mga bisita. Nganong kadtong diha sa iyang balangay nag-ila kaniya ingong usa sa mga Saksi ni Jehova? Aw, si Rufino nagsugod sa pagbasa sa librong Mabuhing Walay Kataposan, ug sa dihang nakaabot siya sa kapitulo 13, nakita niya ang dibuho nga si Jesus nagsugo sa iyang mga sumusunod sa buluhatong pagsangyaw. Si Rufino nakahinapos nga ang mga Kristohanon karong adlawa angayng maghimo sa samang buluhaton. Busa misugod siya sa pagpakig-ambit sa iyang mga silingan sa mga kamatuoran sa Bibliya nga iyang nakat-onan.
Nasugdan ang usa ka regular nga pagtuon sa Bibliya uban kang Rufino, ug siya gisuginlan bahin sa mga tigom sa kongregasyon. Sa misunod nga Dominggo siya didto sa Kingdom Hall. Bisan tuod si Rufino nag-edad ug 80, siya mibaktas sulod sa tulo ka oras aron makaabot didto! Sukad niadtong adlawa, wala gayod siya mapakyas sa pagtambong ug tigom gawas lang kon siya masakiton kaayo. Nagpalista pa gani siya sa Tunghaan sa Teokratikanhong Ministeryo ug mihatag ug maayong pakigpulong. Nasakit si Rufino sa miaging tuig, ug siya namatay niadtong Hulyo 1996, uban sa lig-on nga paglaom sa pagkabanhaw sa usa ka paraisong yuta.
Kami nagtuo nga ikaw usab makapahimulos pinaagi sa pagbasa sa maanindot-ug-mga-hulagway, 256-panid nga librong Ikaw Mabuhing Walay Kataposan sa Paraiso sa Yuta. Kon buot nimo nga makadawat ug usa ka kopya niini o buot nga makabaton ug libreng pagtuon sa Bibliya sa balay, palihog pagsulat sa Watch Tower, P.O. Box 2044, 1060 Manila, o sa haom nga adres nga nalista sa panid 5.