Ang Tanan Niyang Pangutana Natubag

Usa ka lalaki sa India nga naduaw sa mga Saksi ni Jehova nakadiskobreng ang ilang gitudlo lahi kaayo sa gitudlo kaniya sa simbahan. Siya nakigsulti sa mga Saksi ni Jehova bahin niini ug nagsulat pa ngadto sa ilang sangang buhatan sa India aron mangutana.

Unya, usa ka adlaw ang lalaki misulat sa usa ka sulat nga nagsugod: “Minahal kong mga igsoon sa Lonavla”​—ang dapit sa sangang buhatan sa mga Saksi sa India. Misaysay siya: “Ang tanan kong mga pagduhaduha ug mga pangutana awtomatikong natubag sa Mayo 8, 1995, nga magasing Pagmata! sa topikong ‘Nahibulong Ka ba Sukad?’ Ako bug-os nga kombinsido nga ang mga Saksi ni Jehova nakabaton sa kamatuoran.”

Ang maong artikulo sa Pagmata! nagtubag sa mga pangutana sama sa mosunod: “Ang matuod nga pagsimba ba mosulay pagtago o magpuli sa gipadayag nga ngalan sa Diyos?” “Unsang matang sa panggawi ang angay ipatungha sa matuod nga relihiyon ingong resulta sa mga pagtulon-an niini?” “Ang pagsimba ba nga giuyonan sa Diyos motugot sa pag-apil sa mga gubat ug sa rasanhon o tribonhong mga pagpatay?”

Kami masaligon nga ang Pagmata! makatabang usab kanimo sa imong pagpangita sa kamatuoran sa Bibliya. Kon buot nimong makadawat ug kopya o may usang moduaw sa imong balay aron paghisgot sa Bibliya uban kanimo, palihog pagsulat ngadto sa Watch Tower, P.O. Box 2044, 1060 Manila, o sa nahiangayng adres nga gilista sa panid 5.