“Mao Kadto ang Unang Libro nga Iyang Gibasa Sukad”
Ang mga Saksi ni Jehova sa Ukraine kanunay nga makig-estorya sa mga tawong nag-atang ug mga tren. Usa ka babaye nga nagpakitag interes sa Bibliya ang gihatagan ug kopya sa Akong Basahon sa mga Estorya sa Bibliya, usa ka publikasyon nga naggamit ug daghang hulagway sa kronolohikong kasaysayan niini sa Bibliya.
Sa ulahi, sa mao gihapong estasyonan sa tren, nakita pag-usab sa babaye ang Saksi ug gipasalamatan siya sa libro, nga nagpatin-aw: “Ang akong anak lalaki walay ganang magtuon sa iyang mga libro sa eskuylahan. Halos dili kini niya basahon. Apan sa dihang akong gihatag kaniya ang Estorya sa Bibliya nga libro, iyang nakita ang mga hulagway ug giganahan kaayong mobasa niini. Nabasa niya ang tibuok libro sa mga hapit duha ka semana. Mao kadto ang unang libro nga iyang gibasa sukad. Apan labaw sa tanan, nalipay siyang nakaila sa Diyos. Ug ako mismo nalipay nga makita kining mga kausaban diha kaniya. Palihog hatagi kog dugang pang mabasa.”
Laing babaye ang nagtindog sa duol ug nakadungog niining estoryaha. Siya nangutana kon makakuha ba siya ug kopya sa Akong Basahon sa mga Estorya sa Bibliya. Ikaw mahimo usab nga makabaton ug kopya niining 256-panid nga libro o mahimong may moduaw sa imong balay aron hisgotan uban kanimo ang bili sa edukasyon sa Bibliya, pinaagi sa pagsulat sa Watch Tower, P.O. Box 2044, 1060 Manila, o sa haom nga adres nga nalista sa panid 5.