Makabuhi Kinig Paglaom

Mao kana ang pagbati sa usa ka tawo nga nakadawat ug kopya sa upat-ka-panid nga pulyeto nga gitawag Kingdom News. Kini dunay ulohan nga “Nganong Puno Kaayog Suliran ang Kinabuhi?” Ang sulat sa tawo bahin niini gipatik sa mantalaang El Tiempo, sa Bogotá, Colombia. Siya misulat:

“Niining mga panahona diin ang tanan morag nagakahitabo uban ang mga buhat sa kapintas ug pagkadunot, nga atong gibati nga nagakaupos ang atong paglaom, kita kinahanglang mangita ug igong espirituwalidad aron matabangan nga magpabiling buhi ang atong pagtuo. Ania ang diwa sa basahon nga gitunol kanako:

“‘Ang Bibliya nagpadayag nga ang Diyos manghilabot sa tawhanong mga kalihokan pinaagi sa iyang langitnong kagamhanan diha sa mga kamot ni Jesu-Kristo. Kini nga Gingharian magadugmok sa tanang dunot nga kagamhanan sa planeta. Duna kahay pipila nga maluwas sa kataposan niini nga kalibotan? Asa magpuyo sa walay kataposan ang mga maluwas? Ang matarong magapanag-iya sa yuta. Sa bag-ong kalibotan sa Diyos, wala nay kamatayon. Wala na unyay krimen, kakabos, gutom, sakit, pagtiyabaw, ni kamatayon. Ang patay mabuhi pag-usab, ug ang yuta mahimong literal nga paraiso.’”

Ang mga Saksi ni Jehova malipay sa pagtaganag pag-abag kanilang nagtinguha sa pagtubo sa kahibalo sa Bibliya. Kon buot mong makadawat ug dugang impormasyon, palihog ug sulat sa Watch Tower, P.O. Box 2044, 1060 Manila, o sa kinadul-ang adres nga nalista sa panid 5.