Paglaom sa Usa ka Rusong Batang Babaye

Usa ka 15-anyos nga batang babaye sa Ukhta, Rusya, usa ka siyudad nga may kapin ug 100,000 ang populasyon nga kapin sa 1,200 kilometros sa amihanan-sidlakan sa Moscow, nagpahayag ug tim-os nga tinguha alang sa mas maayong mga kahimtang sa yuta. Siya nagpatin-aw niini diha sa mosunod nga sulat ngadto sa sangang buhatan sa mga Saksi ni Jehova sa Rusya:

“Giingnan ko sa akong higala nga ang librong Ang Labing Bantogang Tawo nga Nabuhi Sukad nagbatbat sa kinabuhi ni Jesu-Kristo. Interesado kaayo ako sa inyong mga libro, mga magasin, ug mga brosyur. Patin-awa ako kon nganong naugmad ko kini nga interes. Nahitabo kadto sa buhatan sa telegrama sa dihang miadto ako aron sa pagbayad sa mga balayranan sa radyo ug sa telepono. Didto akong nakit-an ang usa ka tract diha sa salog. Gipunit ko kini, gipaphaan sa hugaw, ug gibasa ang tract, nga nag-ulohang Nganong Puno Kaayog Suliran ang Kinabuhi?

“Gibasa ko ang mga suliran ug pag-antos nga naangkon sa mga tawo, ug ang hapin sa tract nag-ilustrar sa saad sa usa ka bag-ong kinabuhi sa Paraiso. Ako naglaom nga sa dili madugay kini moabot. Buot ko gayod nga makita ang tanang tawo nga malipayon, matagbawon, ug mahimsog ug usab makita ang patayng mga paryente. . . . Buot kong mahibalo kon unsay akong buhaton aron makabaton ug paglaom nga mabuhi sa yutan-ong Paraiso. Naghangyo ako kaninyo nga magpadala kanakog pipila ka impormasyon o mga libro. Akong bayran kini ug ang bayad sa koreyo.”

Ikaw usab makadawat ug literatura nga makatabang nimo nga makabaton sa malig-on pinasukad sa Bibliya nga paglaom sa kinabuhi diha sa paraisong yuta. Kon buot ka nga makadawat ug usa ka kopya sa brosyur nga Unsay Gikinahanglan sa Diyos Kanato? o buot nga adunay moduaw nimo sa imong balay sa pagdumalag libreng pagtuon sa Bibliya uban nimo, palihog pagsulat sa Watch Tower, P.O. Box 2044, 1060 Manila, o sa nahiangay nga adres sa panid 5.