Siruhano sa Kasingkasing Nagpahalipay sa Pagmata!
Ang Pagmata! sa Disyembre 8, 1996, naghisgot sa serye sa mga artikulo nga nag-ulohang “Atake sa Kasingkasing—Unsay Mahimo?” Si Propesor Thomas Stegmann, usa sa pangunang mga siruhano sa heart transplant sa Alemanya ug pangulo sa departamento nga nalangkit sa pag-opera sa dughan ug sakit sa kasingkasing, nagbasa sa mga artikulo ug misulat sa mga magpapatik ingon sa mosunod:
“Gibasa ko nga maikagon ang inyong taho sa ulohan labot sa sakit sa kasingkasing ug, ilabina, ang mga atake sa kasingkasing. Ingong eksperto niining natara, naaghat ako sa pagsulti kaninyo nga maayo kaayo ang inyong pagpatin-aw sa mga atake sa kasingkasing ug sa inyong impormasyon bahin sa ulohan—nga nagpakita, sa usa ka bahin, sa dakong pagsabot sa indibiduwal nga pasyente nga may sakit sa kasingkasing ug, sa laing bahin, sa hustong asoy sa medikal nga mga kamatuoran. Ang pagpatin-aw nagtaganag matulon-anong sumaryo ug bug-os nga impormasyon. Hinungdanon usab ang inyong paghatag ug dakong importansiya sa sayong pag-ila sa mga simtoma sa atake sa kasingkasing.
“Bisan pa sa hinugpong nga mga paningkamot sa medikal nga siyensiya ug sa katilingban sa katibuk-an, ang arteriosclerosis—ug ilabina ang atake sa kasingkasing—mao ang labing kasagarang hinungdan sa kamatayon sa mga nasod sa Kasadpan. Ingong siruhano sa sakit sa kasingkasing nga nakiglabot kada adlaw sa grabeng mga kausaban sa coronary arteriosclerosis (paggahi, pagkuyos, pagtak-op sa mga ugat) ug nagtambal niining mga sakita pinaagi sa nagkalainlaing mga paagi sa pag-opera sa kasingkasing, ako nahibalo kon unsa ka hinungdanon ang maayong-pasikaranan ug matinud-anong pagpatin-aw ngadto sa populasyon—ug usab ngadto sa umaabot nga pasyente.
“Tugoti ako nga motanyag sa akong mainitong mga pahalipay sa inyong paghisgot niining ulohana—inubanan sa paglaom nga ang inyong artikulo mabatonan sa daghang tawo kutob sa mahimo.”
Kon buot nimong mobasa sa Pagmata! nga regular o buot nga adunay moduaw kanimo sa pagdumalag usa ka libreng pagtuon sa Bibliya sa balay, pagsulat sa Watch Tower, P.O. Box 2044, 1060 Manila, o sa nahiangay nga adres nga gilista sa panid 5.