Usa ka Magtutudlo sa Moscow Natabangan sa Pagmata!

Usa ka magtutudlo misulat sa sangang buhatan sa mga Saksi ni Jehova sa Rusya sa pag-ingon nga nagplano siya nga gamiton ang mga artikulo gikan sa Pagmata! diha sa iyang mga klase sa eskuylahan. Mipatin-aw siya:

“Akong gibati nga ang Pagmata! nagtabang kanako nga makaplagan ang bag-ong kusog nga mabuhi, nagpabalik sa akong kadasig, ug nagpahigawas kanako gikan sa makapaguol nga mga hunahuna. Mapasalamaton ako kaninyo tungod sa talagsaong mga artikulo mahitungod sa pakigbisog sa tawo sa mga mikrobyo [Pebrero 22, 1996, nga isyu]. Ako nakaseguro nga ang inyong mga magasin maghatag ug mga kaayohan sa matag panimalay nga aduna niana.” Siya midugang: “Gusto gayod nako kaayo nga makadawat ug Pagmata! . . . Ang inyong magasin sa walay duhaduha makatabang kanako.”

Ang susamang sulat, nga nadawat gikan sa Stavropol, usa ka siyudad nga kapin sa ikaupat nga bahin sa usa ka milyon ang populasyon, nga nahimutang kapin ug 700 ka milyas habagatan-sidlakan sa Moscow, mabasa: “Buot kong mopedido ug Pagmata! Dili pa dugay nadawat nako ang duha ka kopya niini nga magasin. Ang mga artikulo nagpakita ug pagkamasinaboton sa mga sulirang giatubang sa mga tawo. Ang pipila naghubit ug mga hitabo nga bag-o kanako. Mao kini ang unang higayon nga akong nakaplagan ang ingon ka matinud-anong paghubit sa mga butang.”

Kon buot nimong mopahimulos sa pagdawat ug laing kopya sa Pagmata! o buot nimong may usang moduaw sa imong balay aron paghisgot sa Bibliya uban kanimo, palihog pagsulat sa Watchtower, P.O. Box 2044, 1060 Manila, o sa nahiangayng adres nga gilista sa panid 5.