Nganong Hinungdanon nga Ugmaron sa mga Kristohanon ang Hataas-nga-Pailob?
ANG hataas-nga-pailob naggikan kang Jehova nga Diyos. Kini maoy bunga sa iyang espiritu. (Galacia 5:22) Ang tawo, nga hinimo sa dagway ug kasama sa Diyos, adunay usa ka sukod niining hiyasa ug makaugmad niana pinaagi sa pagsunod sa Pulong sa Diyos ug sa pagtultol sa iyang balaang espiritu. (Genesis 1:26, 27) Busa ang mga Kristohanon gisugo sa pag-ugmad ug pagpasundayag niining hiyasa. (Colosas 3:12) Kini maoy ilhanan sa usa ka ministro sa Diyos. (2 Corinto 6:4-6) Si apostol Pablo miingon: “Magmataas-ug-pailob sa tanan.” (1 Tesalonica 5:14) Iyang gipakita nga hinungdanon ang pagpasundayag niining hiyasa aron makapahimuot sa Diyos. Apan ang pagkataas-ug-pailob sa usa dili tinuoray kon kini inubanan sa pagbagulbol ug pagreklamo. Gipakita ni Pablo nga ang dalayegong butang mao nga “magmataas-ug-pailob uban ang kangaya.”—Colosas 1:9-12.
Gawas sa kangaya nga mabatonan sa usa pinaagi sa hataas-nga-pailob, daghan ang ganti. Si Jehova magantihan sa pagkaaging mahimaya ang iyang ngalan. Ang hagit batok sa pagkamatarong ug pagkaangayan sa pagkasoberano sa Diyos mapamatud-ang sayop, ug siya mabindikar. (Genesis 3:1-5; Job 1:7-11; 2:3-5) Komosta kon iyang gipatay si Adan, Eva, ug Satanas sa panahon sa ilang pagsupak? Ang uban manghinapos tingali nga si Satanas may katarongan sa iyang hagit. Apan pinaagi sa hataas-nga-pailob, si Jehova naghatag sa mga tawo sa kahigayonan sa pagpamatuod ubos sa pagsulay nga sila mopalabi sa iyang pagkasoberano ibabaw kanila ug nga buot nilang moalagad kaniya tungod sa iyang maayong mga hiyas, oo, sa pagpasundayag nga sila mopalabi sa pagkasoberano ni Jehova kay sa bug-os nga pagkaindependente, nga nahibalong mas maayo kini.—Salmo 84:10.
Si Jesu-Kristo, tungod sa hataas-nga-pailob sa pagkamasinugtanon sa Diyos, nakadawat ug labing kahibulongang ganti, gibayaw ngadto sa hataas nga posisyon sa pagkahari ug gihatagan sa iyang Amahan “sa ngalan nga labaw sa tanang uban pa nga ngalan.” (Filipos 2:5-11) Gawas pa niini, nakadawat siya ug usa ka “pangasaw-onon” nga gilangkoban sa iyang espirituwal nga mga igsoon, ang Bag-ong Jerusalem, nga gihawasan ingong siyudad, nga ang patukoranang mga bato niana gisulatan sa mga ngalan sa 12 ka apostoles sa Kordero.—2 Corinto 11:2; Pinadayag 21:2, 9, 10, 14.
Sa susama, dagaya ang ganti alang sa tanang tawo nga nag-ugmad ug hataas-nga-pailob ug naghupot niana nga kaharmonya sa katuyoan sa Diyos. (Hebreohanon 6:11-15) Nabatonan nila ang katagbawan sa pagsundog sa hiyas sa Diyos, sa pagtuman sa kabubut-on sa Diyos, ug sa pagdawat sa pag-uyon sa Diyos. Dugang pa, ang ilang hataas-nga-pailob magpahinabog kalamposan sa pagtabang sa uban nga makaila sa Diyos ug sa pagbaton ug kinabuhing walay kataposan.—1 Timoteo 4:16.