“Makaparepresko Niining Gubot nga Kalibotan”

MAO kanay paghubit sa 22-anyos nga si Igor nga taga-Yugoslavia sa magasing Bantayanang Torre diha sa usa ka sulat sa miaging tuig. Siya misaysay:

“Nagsugod akog basa sa magasin nga Bantayanang Torre duha ka bulan kanhi. Gibasa ko ang bag-o ug daandaang mga isyu sa Ang Bantayanang Torre (gikan sa 1991), ug nagustohan ko kini pag-ayo. Sa akong hunahuna ang usa ka magasin nga sama niini tinuod gayod nga makaparepresko niining gubot nga kalibotan.

“Ang mga artikulo nga inyong gipatik bahin sa mga misyonaryo ilabinang nakapainteres kanako, ug kini ang rason nga ako nagsulat kaninyo. Una, interesado akong masayod kon mahimo ba akong usa sa mga Saksi ni Jehova. Kinahanglang isulti ko nga ako usa ka Katoliko, apan sa akong hunahuna mas maayo ang inyong relihiyon kay sa bisan unsa pang uban, ilabina tungod kay walay laing relihiyon nga nanlimbasog pag-ayo sa pagpakaylap sa Pulong sa Diyos.

“Kon ang kamatuoran nga ako usa ka Katoliko dili babag, interesado akong masayod kon unsaon nga ako mahimong usa sa mga Saksi ni Jehova. Usa ra ang akong tinguha. Kon posible gayod, gusto kong mabawtismohan sa Belgrade. Kon posible kini, palihog sultihi ako kon kanus-a ako makaadto ug kon duna bay bisan unsang kinahanglanon alang sa bawtismo. Kon ang akong tinguha dili mahimo, palihog pahibaw-a ako kon asa ako mabawtismohan ug kon kinsay akong duolon alang niana.

“Sunod, gusto kong masayod kon sa unsang paagi ang usa mahimong misyonaryo. Gusto kong masayod kon makasugod na ba ako sa pagbansay alang sa misyonaryong buluhaton human gayod sa akong bawtismo. Kinahanglanon pa ba nga makabatog tinong gidaghanon sa katuigan diha sa pag-alagad? . . .

“Palihog hatagig ugdang nga pagtagad ang akong sulat. Sa akong hunahuna ang pagkahimong usa ka misyonaryo mao ang labing maayong paagi sa pagpakaylap sa maayong balita sa Gingharian sa Diyos.”

Sa panid 2 sa matag isyu sa Ang Bantayanang Torre, ang katuyoan sa magasin gisaysay: “Kini nagalipay sa tanang katawhan sa maayong balita nga ang Gingharian sa Diyos duol nang maglaglag sa mga naglupig sa ilang isigkatawo ug nga himoon niini ang yuta nga usa ka paraiso.” Kon buot nimo ug usa ka kopya o buot nga adunay usa nga moduaw sa imong balay sa pagdumalag usa ka libreng pagtuon sa Bibliya uban nimo, pagsulat sa Watch Tower, P.O. Box 2044, 1060 Manila, o sa nahiangayng direksiyon nga nalista sa panid 5.