Asa Nato Hikaplagi ang mga Tubag?

Mas daghan ug mas daghang tawo ang nalumsan sa mga suliran ug komplikadong mga pangutana nga giatubang nila karong adlawa. Unsay angay nga pag-isip nato sa pagbakak? Matarong ba ang pagsugal? Komosta ang pagpakiglangkit sa espiritismo? Unsay angay nga pag-isip nato sa pagtaktak sa gimabdos? Daotan ba ang pagkahubog o nga ang mga dili-pa-kasado makigsekso?

Walay kataposan ang mga pangutana. Ug kini sila mag-apektar dili lamang sa atong kinabuhi kondili sa mga kinabuhi usab sa atong mga minahal. Buot sa mga tawo ang mga tubag nga makahatag nilag kaayohan. Usa sa maong tawo, nga taga-Mississippi, sa Tinipong Bansa, misulat sa Watch Tower Society:

“Sa likod sa inyong librong may titulong Ang Sekreto sa Kalipay sa Pamilya, akong nabasahan ang usa ka gipatik nga pangutana nga misukna kon buot ba nako ang dugang impormasyon o ang libreng pagtuon sa Bibliya sa balay. Sa tinuod, buot gayod nako!

“Sukad gayod sa ting-init sa 1995, ako nagbasa ug nagtuon sa akong Bibliya. Ako naningkamot sa labing maarangan nako sa pagsabot sa Bibliya sa sukod nga akong magamit alang sa akong espirituwal nga mga katuyoan ug, labi pang maayo, sa pagtudlo sa uban. Kon inyong giingon nga kamo magpadalag libreng impormasyon, ako mouyon gayod niana!”

Kon buot usab nimong makadawat ug usa ka kopya sa 192-panid nga librong Ang Sekreto sa Kalipay sa Pamilya o buot nga may magdumalag walay-bayad nga pagtuon sa Bibliya sa balay uban nimo, palihog ug sulat sa Watch Tower, P.O. Box 2044, 1060 Manila, o sa nahiangayng adres sa panid 5.