Gikan sa Among mga Magbabasa
Pagkaniwang Ang artikulong “Mga Batan-on Nangutana . . . Nganong Niwang Man Ako Kaayo?” nakapaikag kaayo kanako. (Septiyembre 22, 2000) Ako usa ka 32-anyos nga babaye, apan sukad kaniadto ug hangtod karon ako niwang kaayo ug maulaw gayod sa akong panagway. Gisigehan akog sungog sa tibuok kong kinabuhi, nga anggaan ug Palito o kaha Tikling. Kini sagad nakapaguol kanako. Nalipay ko sa inyong giingon nga kita angayng mangitag mga tawo nga magpabili kanato kon unsa kita sa kinasuloran. Dili angayng tamayon sa mga Kristohanon ang uban tungod lang sa ilang pisikal nga mga panagway.
W. L., Tinipong Bansa
Inhenyeriya sa Henetika Sa miaging gabii, nabasa ko ang seryeng “Makamugna ba ang Siyensiya ug Hingpit nga Katilingban?” (Septiyembre 22, 2000) Akong gidala kini sa trabahoan, nga misangpot sa maayo kaayong panaghisgot uban sa akong amo, nga usa ka doktor. Ang mga ilustrasyon nakapukaw gayod sa hunahuna ug apresasyon. Salamat sa panahon, paningkamot, ug sa ideya nga tataw nga gigahin sa matag ilustrasyon.
N. M., Tinipong Bansa
Salamat sa pagpatin-aw sa komplikado kaayong ulohan sa paagi nga masabtan sa tanan. Sa dihang ang mga siyentipiko mohukom kon kinsa ang angayng magpasanay ug kinsa ang “dili-angayan,” ako nagduhaduha kon gihatagan ba nilag pagtagad ang mga hiyas sama sa gugma, kaluoy, ug apresasyon alang sa espirituwal nga mga butang? Ang pagkalabaw ug pangutok o mas maayong panglawas wala gayod magpasabot sa mas maayong tawo. Ugaling, ako adunay pangutana. Ngano mang gitawag ang pagkawalhon nga usa ka depekto?
J. C., Tinipong Bansa
Ang pahayag nga gihisgotan maoy usa ka kinutlo gikan sa librong “The Biotech Century.” Ang pulong “depekto” makita sulod sa mga quotation mark, nga nagpasabot nga gigamit kini sa awtor agig pagkantalita. Ang pahayag nagpasiugda sa pipila ka etikal nga mga suliran nga motungha tungod sa inhenyeriya sa henetika. Adunay kapeligrohan nga tungod sa katakos sa pag-usab sa tawhanong genetic code, mahimong magbuotbuot ang pipila sa pagpahayag sa mga hiyas sama sa kolor sa panit o pagkawalhon isip dili-maayong hiyas.—ED.
Bisan tuod ang siyensiya dili nako paboritong subject sa eskuylahan, ang mga artikulo nakatandog sa akong kasingkasing. Ang eugenics maoy pagtinguha sa dili-hingpit nga mga tawo nga makab-ot ang kahingpitan. Kon makab-ot man gayod nila kon unsay anaa sa ilang hunahuna, ang masakiton ug baldado lagmit lantawon ingong mga “ubos nga matang.” Ang empatiya alang kanila mahanaw. Sa kasukwahi, ang Diyos nagsaad nga hingpiton niya ang tawo panahon sa Milenyo. (Pinadayag 20:4, 5) Apan buhaton niya kini nga dili maglapas sa atong kagawasan sa pagpili.
S. O., Hapon
Ang Uniberso Daghan kaayong salamat sa seryeng “Ang Uniberso—Sulagma Lang ba nga Mitungha?” (Oktubre 8, 2000) Ako usa ka primero-anyo nga estudyante sa biolohiya, ang mga artikulo samag usa ka teksbok—apan gisulat nga ang tema maoy bahin sa usa ka intelihenteng Maglalalang inay ang teoriya sa ebolusyon. Pagkamakapahupay nga basahon kining impormasyona nga gipresentar sa matinud-anon, makataronganong paagi!
K. L., Tinipong Bansa
Sugilanon sa Kinabuhi Ang artikulong “Akong Pangunang Kabalaka—Ang Pagpabiling Maunongon” (Oktubre 8, 2000), nga sugilanon ni Alexei Davidjuk, nakadasig kaayo nako. Gisaysay ni Alexei nga ang tawo nga iyang gisaligan sa daghang katuigan nagbudhi sa iyang espirituwal nga mga igsoon. Mao usab kini ang nahitabo kanako sa milabayng katuigan sa dihang ang among Kristohanong buluhaton gibando sa kagamhanan. Duha ka “ansiyano” ang mihatag ug mga detalye bahin sa among buluhaton ngadto sa mga sekreta. Ingong resulta, gidakop mi ug gisukitsukit. Usa niining konohay mga igsoon dugay nang namatay. Ang usa gipalagpot gikan sa kongregasyon. Apan, sa dili pa dugay napasig-uli siya. Pagkamapasalamaton ko gayod nga makatimbaya na ako karon niining igsoona nga walay bisan unsang mga pagbati sa kaaligutgot! Kini maoy usa ka butang nga mahimo lamang pinaagi sa espiritu ni Jehova.
D. G., Alemanya