Mga Yawi sa Malamposong Kaminyoon

“Ginagmayng pagpanglimbong: mao kana ang yawi sa malamposon nga romantikong relasyon,” nag-ingon ang La Presse. Ang maong mantalaan sa Canada nagtaho bahin sa usa ka pagtuon nga naghimo sa pagpamakak nga usa ka dalayegong hiyas. Ang pagtuon gipatik diha sa Journal of Social and Personal Relationships. Si Propesor Tim Cole, sa De Paul University, Chicago, T.B.A., miingon: “Pinaagi sa ginagmayng pagpanglimbong [o pagpamakak], atong mapanalipdan ang mga kaayohan nga ikahatag sa [romantikong] relasyon nga dili magpameligro niini.”

Apan, tinuod kaha nga ang pagpanglimbong maoy yawi sa malamposong kaminyoon? Ang Bibliya nag-awhag sa mga Kristohanon: “Karon nga gisalikway na ninyo ang kabakakan, magsulti sa tinuod ang matag usa kaninyo sa iyang silingan.” (Efeso 4:25) Epektibo ba kining tambaga? Sa dihang gipangutana, Unsa ang kinadak-ang rason nga magbulag ang mga magtiayon? ang usa ka abogado sa diborsiyo mitubag: “Kon sila dili mahibalong makigsulti sa matinud-anong paagi, magpahayag sa ilang pagbati ug hunahuna ug magtratar sa usag usa ingong suod nga higala.”

Nan, unsa man ang sekreto sa usa ka malipayong kaminyoon? Ang kapitulo 3 sa librong Ang Sekreto sa Kalipay sa Pamilya may ulohang “Duha ka Yawi sa Malungtarong Kaminyoon.” Kini naghisgot ug duha ka hinungdanong mga butang aron ang magtiayon malipayong mag-uban sa pagkinabuhi, nga moresulta ug daghang panalangin. Mahimo kang mohangyo ug kopya niining libroha pinaagi sa pagpil-ap ug pagpadala sa nagaubang kupon ngadto sa adres nga makita diha sa kupon o sa nahiangayng adres nga nalista sa panid 5 niining magasina.

□ Interesado akong makadawat ug kopya sa librong Ang Sekreto sa Kalipay sa Pamilya.

□ Palihog kontaka ako mahitungod sa usa ka libreng pagtuon sa Bibliya sa balay.