“Kining Videoha Nakaluwas ug Daghang Kinabuhi!”

NIADTONG 1999, ang mga Saksi ni Jehova naghimo ug usa ka video para sa mga batan-on nga nag-ulohang Young People Ask​—How Can I Make Real Friends? Sa pagkakaron, kini giluwatan diha sa kapin sa 30 ka pinulongan. “Kining videoha dakog epekto kanamong tanan!” misulat ang usa ka magtatan-aw sa kongregasyon sa Ukraine. “Ang pipila kalima nang nakakita niini, ug ang uban kapito na! Sa ulahi, daghang batan-on ang malipayong naghisgot sa makaiikag nga mga punto niini. Daghan ang nanghilak. Gibati namong tanan ang gugma ug malulotong kahingawa ni Jehova alang sa mga batan-on. Mas nasabtan na nako karon ang panginahanglan sa mga batan-on, ug buot kong makatabang gayod kanila. Ug gusto kong mahimong suod nga higala nila.”

Ang mga batan-on sa tibuok kalibotan natandog gayod niining videoha. Pananglitan, ang usa ka 17-anyos nga si Leticia nga taga-Uruguay (hulagway sa wala) misulat: “Natandog gayod ako sa impormasyon nga gipresentar ug akong nasabtan kon sa unsang paagi si Jehova ug ang iyang organisasyon nagpakitag interes kanamong mga batan-on. Dili nako ikahubit sa mga pulong ang akong pagpasalamat ning maong bililhong video. Sa yanong pagkasulti, daghan kaayong salamat!”

Usa ka hingkod nga Saksi sa Tinipong Bansa ang kadaghan nang nakakita niining videoha ug naggamit niini aron tabangan ang usa ka tin-edyer nga adunay dobleng pagkinabuhi. Siya misulat: “Si Annette nalangkit sa pag-inom ug sa daotang mga kauban, ug nakatilaw pa gani siyag mga droga.a Apan kining videoha nakatandog gayod kaniya. Sa wala madugay, iyang gibiyaan ang daotan niyang mga kauban ug mga binuhatan. Unom ka bulan sa ulahi nabawtismohan siya. Sa pagkatinuod, kining videoha nakaluwas ug daghang kinabuhi!”

◼ Sa 2004, ang mga Saksi ni Jehova nagluwat ug laing video alang sa mga batan-on. Kini nag-ulohang Young People Ask​—What Will I Do With My Life? Gilaoman nga pinaagi niining DVD nga video, daghang batan-on ang madasig nga unahon ang pagsimba kang Jehova diha sa ilang kinabuhi.​—Mateo 6:33.

[Footnote]